Ethiopia, Lber:
Katkum ki khubor la ong ba ha ka jingshisha la thmu ban plie biang noh ia ki skul sha ki thaiñ North Tigray jong ka Ethiopia naduh ki 3 snem ba la leit, hadien ba la mih ka jingïakynad hapdeng ka Tigray People Liberation Front (TPLF) bad ka Sorkar kmie ha kitei ki snem ha kaba la maham ruh ba dei ban khang noh ia baroh ki jaka pule bad ki skul kiba don ha katei ka jaka.
Ha kitei ki por jong ka thma, la ong ba kiba shiteng na ka jingdon ki skul hapoh Tigray, ki la shah pynjulor lut bad la khang khyrdep noh ia baroh ki jaka pule kiba don ha katei ka thaiñ namar jong ka thma ha katei ka por. Kumjuh ruh la ong ba wat da ki nonghikai ruh kim shym la ioh tulop bad ki la shah trei khlem tulop la 2 snem lynter.
Kumta la ong ba ha kane ka por, ki bor pyniaid jong ka Ethiopia ki dang peit bad bishar bniah bha ia ka jinglong- jingman baroh ha katei ka thaiñ baroh kawei bad khnang ba yn ioh ban pyntikna noh bad ba yn shym rai hapoh jong u Iaiong u ban wan.
U heh ka tnat pule- puthi jong ka UNICEF, u Chance Briggs haba ïakren bad ki lad pathai khubor ha Africa u la kren teng shaphang kane ka jingthmu ban plie biang noh ia ki jaka pule hapoh Ethipia.
Nalor kata, u la iathuh ruh ba ka pule puthi hapoh Tigray ka la pulom bad khyllem noh naduh u Naitung jong u snem ba la leit bad ki don ruh palat 2.3 Million ki khynnah kiba la sangeh pule bad ki bym leit skul shuh.
Kawei ka longïing na Tigray, ka la iathuh ba napdeng ki 4 ngut ki khun jongki, 2 ngut ki dei kiba dang sdang leit ia ka kyrdan Primary ha ka por ba katei ka thma ka la khie.
Kumta, la ong ba kiba bun bah ki nonghikai jong katei ka nongbah kiba la shu trei satar khlem ka tulop bad tad haduh kane ka kynti ruh kim shym la ioh ia ka tulop kaba ki la dep ban trei ha kitei ki snem ba la leit.
