Shillong, Lber 29:
Ka Hynniewtrep Youth Council (HYC) ka la leit ban aiti da ka dorkhas ha ka Myntri ka tnad aiñ, ka Kong Ampareen Lyngdoh halor ka jiingleit ai jingmut jong ka seng ban khmih janai bha sa shisien halor ka jingpyntreikam ïa ka ‘Roster System’ hapoh ka jylla.
Haba kren sha ki lad pathai khubor ha ka sngi Balang, u President ka HYC u Bah Robertjune Kharjahrin ha ryngkat lang bad u General Secretary Bah Roy Kupar Synrem, u la ong ba ka seng ka la leit ïakynduh ïa ka Myntri ban ïakren halor ka Reservation Roster Maintenance Policy kaba ka pynmih da ka sorkar Meghalaya Democratic Alliance (MDA) kaba rim ha u bnai Jymmang, 2022.
U Bah Robert u la ong ba lada ïaid ban pynkhreh ïa ka Roster System naduh ba la pyntreikam ïa ka Reservation Policy ka mut hap ban ïaid naduh ka por ba ka jylla Meghalaya ka dang don hapoh ka jylla Assam.
“Lada phi pynmih ïa kano kano ka hukum, ïa kata ka hukum ka bha ba phin pyntreikam naduh ka sngi ba mih shakhmat ym dei shadien,” la ong u Bah Robert.
U Bah Robert u la ong ba ka ïingkashari lane ka High Court kam pat shym la ong satia ba ka la pdiang ne mynjur ïa ka Reservation Roster Maintenance Policy hynrei ka dang kren shai ba ki don ki katto katne ki bynta jong katei ka Reservation Roster Maintenance Policy kam pat bishar eiei.
“Lada ngi ong ba ka High Court ka la mynjur ïa kane ka Roster Maintenance Policy kam pat dei namar ba ka High Court ka la ong ba ngi khlem shym la ktah eiei ruh em ïa ka ‘Validity’ jong ka bad ngim shym la ktah ïa kata ka ‘Merit’ jong kane Maintenance Policy,” la ong u Bah Robert.
U la ong ba ka seng ka khmih lynti ba ka Myntri ha ryngkat ka tnad treikam jong ka, kin pdiang ïa ka jingai jingmut jong ka seng ba lada long katba long ka Roster System ka dei ban treikam naduh ka sngi ba pynmih shakhmat ym ba kan phai dien shadien.
Shuh shuh u Bah Robert u la ong ba ha ki sngi kiba la dep, na ka liang u Myntri Rangbah ka jylla, u Conrad K Sangma hapoh ka ïingdorbar thawaiñ, u la kren shai ba ki bym hun ïa ka Roster Maintenance Policy ki lah ban leit ïatai shapoh ka ïingkashari kaba mut na ka liang u Myntri Rangbah um kwah shuh ban dang ïakren ïa katei ka mat hapoh ka sorkar hynrei na ka liang ka seng ka la ong ba kan ïai ap kumba shitaïew bad lada kano kano kaba bha kam mih na ka jingïakren, ka seng kam banse ban leit noh sha ïingkashari.
“Lada ngi leit sha ïingkashari ïa kane ka kam, kaba ma ïoh ki mih shibun ki kynrum ki kynram hynrei na ka liang ka seng pat ngi la wan ai jingmut shwa ïa ka Myntri ka tnad aiñ ba kan pynbeit bad pyrkhat arsien ïa kane hynrei lada ha kine ki sngi ki ban wan la ka long ha ka shitaïew kam don kano kano ka jingmih kaba bha na kane ka jingïakren, ngim banse ngi hap ban ïaid noh ïingkashari,” la ong u Bah Robert.
U la ong ba lada na ka liang ka sorkar kam kwah shuh ban ïakren bad pynbeit ïa kane, na ka liang ka seng kan nym lah satia ban shu peit ba ki khun samla ka Hynñiewtrep kin duh kam duh jam katba kiwei pat ki jaidbynriew ki ïoh kam.
U la ong ba ka seng kam kwah ban wanrah ïa ka jingsngewïapher jaidbynriew hapdeng u Khasi-Jaiñtia bad u Garo hynrei ïa ka bhah thungkam thungjam la pynïeng halor ka nongrim ban pynïapher jaidbynriew namar ha kylleng ka Ri India kam ju don kata ka bhah thungkam thungjam kaba kyrpang ïa kano kano ka jaidbynriew hapoh ka bhah thungkam thungjam ïa ki riewlum ne ‘Tribal Reservation’.
Shuh shuh haba kylli ba u sngew kumno halor ka jingpyrshah jong ki seng napoh Ri Lum Garo ha kaba ki la ong ba lada ka mih ka jingpyrshah ïa ka Roster System kan wanrah ïa ka jingïapher jingmut hapdeng u Khasi bad u Garo, u Bah Robert u la ong ba ka dei ka jingïapher jingmut ba kan sa don ka jingïapher jingmut ruh ha kaba ïadei bad ka bhah thungkam thungjam.
