Jowai, Lber 30:
Ki wasan waheh, shakri niam ka Raij Jowai ha ka jingïalam u Dolloi kum u khlieh ka niam khlieh ka elaka u la pyndep ïa ka lehniam Kñia ainguh kaba tip kum ka Kñia “Thoh Langdoh” ne ka Knia ainguh ïa u blei Langdoh.
Kumban shu pynkynmaw, shwa ban poi kane ka sngi, haka 26 tarik Lber ki shakri niam ka raij ryngkat bad ki waheh wasan ka Raij ki la mih shakhmat ka ïew ka Syiem ban pyndep ïa ka lehniam Kbai Mooknor hakhmat ka ïew ka Syiem ba la poi ka por ban sdang noh ïaka Niam Behdeinkhlam hapoh ka shnong ka Raij.
Katkum ka rukom dustur ba la pynjuh ki longshwa, ha kane ka sngi Thoh Langdoh ne Kñia Thoh Langdoh, ka adong niam ka khang bad mana pyrshah ban pom ban daiñ, pynmong, pynpra ne pyntngit pynjngut ïaka mei mariang namar kane kadei kawei na ki sngi ban pynkhraw ïaka burom jong ka mei mariang kaba bsa ba pjiah ïa u khun bynriew ha baroh ki liang.
Hakhmat ka Duwan Kñia ba don u “Moo Langdoh” ïaka lehniam ha kane ka step la pyndep da u Sangot Paswet ryngkat ka jingsynran lang u Sangot Pasubon bad u Sangot Pakynteiñ bad katkum ki dak ki shin ba la paw na ka jingkñia la ong ba ka lehniam ne Kñia ai nguh ha kane ka step ka long kaba bha ba miat.
Ha kane ka step, hadien ba la pyndep ïaka lehniam na Kloo Langdoh, ka bynta ba bud jong ka niam ba ki Wasan ki hap ban pyndep ha Ïung Langdoh kadei ka “Thung Sang” ha kaba ki Wasan kin shim ïa u symbai Toh symbai riewhadem-sohkhia bad ki bet ha kper rasa kaba don ha syndah ka ïung Langdoh bad da ka jingpyndep ïa kane ka niam ki khun ka Raij ka shnong haka sngi babud ki la long ban sdang noh ïaki jingthung jingbet jong ki.
