Shillong, Lber 30:
U kyrtong ka Congress na Sohïong konstitwensi, Bah Osborne Kharjana, u la ong ba ki paidbah ka Sohïong konstitwensi ki la phai khmat beit sha ka seng Congress hadien ba ka UDP, NPP, HSPDP ki la leit ban ïatreilang bad ka BJP na bynta ban thaw ïa ka sorkar bathymmai mar shu dep ka jingñiew vote ha ka 2 tarik Lber, 2023.
U la ong ba ki ar ngut ki MLA ka HSPDP kiba la mynjur ban leit phai ban thaw ïa ka sorkar seng riewlum da kaba don jingkyrmen ba ka UDP kan ïalam ïa ka sorkar ba la kyrshan lang da ka Congress, TMC, VPP. Pynban kaba sngewsih ka long ba u President ka UDP u Bah Metbah Lyngdoh u la leit ban ai jingkyrshan ïa ka seng NPP bad kane ka long kumba ki la pynkthang mynsiem ïa ki paidbah.
Nangta u la ong ki bahaïing jong u Bah HDR Lyngdoh (bam kwai ha dwar u blei) haduh mynta ki dang kyrshan ïa u, wat la ka UDP ka la rai ban ai tiket ïa u Bah Synshar Lyngdoh uba baroh ki tip kum u Pup uba dei ruh pyrsa trai jong u Bah HDR namar dei u Bah Synshar uba la leit ban kyrshan ïa u Bah Samlin Malngiang ha u snem 2018 kaba pynlong pat ïa u Bah HDR ban shah rem noh ha ka ilekshon.
U Bah Osborne u la ong ha ka ilekshon MLA ha u snem 2018 ki bahaïing jong u Bah HDR Lyngdoh ki kyrshan lut ïa u, hynrei mynta haba la ïeng sa u pyrsa trai u Bah HDR Lyngdoh u Bah Synshar Lyngdoh ki bahaïing hasem kim kyrshan shuh ïa u. Kane ka dei namar kim sngewtynnad hadien ba shah rem u Bah HDR ha utei u snem namar ka jingïaleh pyrshah u Bah Synshar bad ka ïing ka sem jong u.
Shuh shuh u la pynpaw ka jingsngewkhia namar kiba buaid ki dang pyngngad, hynrei kiba buaid tyngka, ki kyllut ka shkor, ki matlah haba ïohi ruh haduh ba ki nud ban die ïa ka ri.
Nalorkata, u la ong ka synshar ka khadar ka shong ha ki paidbah namar ka ri bad ka jaidbynriew ka im ka dei haba ki paidbah ki stad ban jied ïa ki nongthaw aiñ.
Haba ïadei bad ka jingwan u Myntri Rangbah ka ri India, u Narendra Modi ha ka por ba pynbam smai ïa u Myntri Rangbah ka jylla bad ki Myntri, u Bah Osborne u la ong ba kane ka pyni ba ïa ka jylla Meghalaya la synshar da ka BJP.
“Nga la kren ïakren bad u Bah Ardent ba un ïarap lem ïa nga ha kane ka ilekshon, hynrei u la kren shai ba um lah ban leit namar u dei u President ka VPP. Hynrei u la kular ban shu kyrshan ïa ka Congress ha kane ka ilekshon” u la ong.
Kumta u la kyrpad ïa ki paidbah ka Sohïong haba kin leit jied ïa la u jong u nongthaw aiñ ha ka 10 tarik Jymmang 2023 kin da pyrkhat bha ym ban peit ïa ka pisa, hynrei ban peit ïa ka jingmyntoi jong ka jaidbynriew.
