Jowai, Lber 30:
U Lat ka jylla Meghalaya, u Phagu Chauhan ha ka sngi Palei u la hiar ban leit jngoh ïa ka Durga Temple kaba don ha shnong Nartiang, West Jaiñtia Hills District.
Ïa u Lat ka jylla la pdiang sngewbha da u Deputy Commissioner ka West Jaiñtia Hills District, u Bah BS Sohliya bad u Superintendent of Police ka West Jaiñtia Hills District, u Bikram D Marak nalor ki heh ophisar ka District, ki pulit, ki nongpeit ïa ka temple kumjuh ruh ki trai shnong, ki ophisar na ki tnat treikam sorkar bapher bapher bad ki khynnnah skul jong ka Ram Krishna Mission Secondary School, Nartiang.
Hadien ba la dep ban jngoh ïaka temple, u Lat u la leit peit ruh ïa ka kper Mawbynna ne Monoliths ba don ha kane hi ka shnong Nartiang.
Hadien kane pat, u la leit sha ka ophis jong ka Soil and Water Conservation Rest House ha Jowai na ka bynta ka bam ka dih bad ka jingïakren bad ki sahep sorkar jong ka District bad hadien kane pat u Lat u la leit phai sha Raj Bhawan, Shillong.
