Shillong, Lber 30:
Ka ïingbishar Lower Court ha ka sngi Palei ka la ai jamin ïa u heh pulit uba la shah weng kam shipor bad shah kem hadien ba la kynnoh ba u la donkti ha ki kam bamsap.
Ïa ka jingïoh jamin jong u Bah Gabriel K Ïangrai, la pyntikna da u nongïasaid aiñ jong une u heh pulit u P Yobin.
U Bah Ïangrai u la shah kem ha ka 2 tarik Naiwieng, 2022 ha ka tnat CID hadien ba pynlong ka jingkhynra ïa ka ïingsah jong u ha Shyiap, Golflink.
Ki pulit ki la pynrung case pyrshah ïa u ha ka 28 tarik Risaw 2022 halor ka jingkynnoh ba u pyndonkam bakla ïa ka pisa ba la mang sha ka jingtei jong ka NERS PSAP ha Sadar PS Complex.
Shuwa kane, ka kynhun tohkit ba la khlieh da u Inspector General (Law & Order) u Mukesh Kumar Singh, ka la lap ïa ka jingdonkti u Bah Ïangrai ban thied haduh 29 tylli ki kali ha ka por ba u dang bat kum u Assistant Indpector General of Police (Administration).
