Nongpoh, Lber 30:
U Myntri ka jylla ba dei khmih ïa ka tnat Animal Husbandry and Veterinary, u Bah A.L Hek ha ka sngi Palei u la leit ban plie paidbah ïa ka jaka ‘recharge’ kali lyngba ka bording ilektrik kaba nyngkong eh ha ka jylla kaba la tip kumta kata ka Electric Vehicle (EV) Fast-Charging station ha ka jaka thep umphniang jong ka Bharat Petroleum Corporation Limited (BPCL) kaba don ha Jorabat.
Ïa katei ka jaka ‘recharge’ kali kaba 30KW la plie paidbah ha ka jingïadon ryngkat jong u Additional Deputy Commissioner ka Ri Bhoi, u Bah MB Tongper, u State Head Retail jong ka BPCL North East, u Pankaj Jain, u DGM Retail Initiative jong ka BPCL, u Debashish Jain, u Territory Manager (Retail) jong ka Shillong BPCL, u Indranil Banerjee, u trai katei ka jaka thep umphniang, u Shripal Jain lem bad u trai ka M/S Bimal Cars Dealers jong ka Tata Motors.
Haba kren ha kane ka sngi, u Bah Hek u la ai ka jingïaroh sha ka kompeni BPCL halor ka jingplie paidbah ïa kane ka jaka ban ‘recharge’ ïa ki kali kiba pyndonkam da ka bording ilektrik lane kita ki ‘electric vehicle’ da kaba ong ba kan ïarap shibun ban pynduna ïa ka jingpynjaboh ïa ka lyer (pollution) hapoh ka jylla.
U la ong ruh kumba ka jylla Meghalaya ka dei kaba bna nam halor ka kam jngohkai pyrthei, kane ka sienjam khlem pep kan wanrah shibun ka jingmyntoi na ka bynta ka mei mariang bad ruh kan kyntiew ïa ka kam jngohkai pyrthei hapoh ka jylla, khamtam ïa kito ki nongjngoh kai pyrthei kiba wan na shabar jong ka ri, kiba dei ki briew kiba shimkhia halor ka koit ka khiah bad ban pynneh pynsah ïa ka mariang sawdong sawkun.
Na ka liang u State Head Retail jong ka BPCL North East, u Pankaj Jain u la ïathuh ba ka BPCL ka la dep ban plie paidbah kumba 17 tylli ki jaka ban ‘recharge’ ïa ki kali ilektrik ha ki lai tylli ki surok bah kiba kham donkam jong ka thaiñ shatei lam-mihngi kum na Guwahati sha Dibrugarh, na Guwahati sha Serampore bad na Guwahati sha North Lakhimpur.
U la ïathuh ruh ba mynta ka sngi, ka BPCL ka la ïoh pat ban plie sa ïa jaka ban ‘recharge’ ïa ki kali ilektrik kaba nyngkong eh ha ka jylla Meghalaya ha ka jaka thep umphniang jong ka kompeni kaba don ha Jorabat. Nangta u la ïathuh ruh ba shen ka kompeni kan sa buh ruh ïa kine ki juh ki jaka ban ‘recharge’ ïa ki kali ilektrik kum ha Nongpoh, Mawïong, Shillong, Jowai bad ha kiwei kiwei ki jaka.
