Tura, Lber 30:
Ki nongtrei ka tnad khlaw jong ka Garo Hills Autonomous District Council (GHADC) – Phulbari Range, West Garo Hills (WGH) ha ka janmiet Sngi Balang ki la ïoh ban pyllait im ïa uwei u khla thapsim ba la tip kum u ‘Asian Leopard Cat’ uba la wan poi sha ki jaka sah briew.
Katkum ka jingïathuh ki nongtrei ka GHADC, la ïoh jingtip hynnin janmiet na kawei ka shnong kaba la tip kum ka Timbogre hajan New Bhaitbari halor ka jingdon jong u khla thapsim hapoh shnong. Kata ka longïing namar ka jingtieng ïoh ba ka kmie (khla) ka wan wad ïa i khun, mar-mar ka la pyntip sha ki nongtrei ka tnad khlaw ka GHADC.
Hadien ba la ïoh jingtip, kawei ka kynhun mar-mar ka la leit sha katei ka jaka ban shimti noh ïa utei u khla thapsim. Katei ka kynhun ka la ïoh ban pyllait im ïa utei u khla bad wanrah noh sha ophis treikam jong ka.
Hynne mynstep, ki nongtrei ka GHADC ki la pyntip noh sha ka tnad Wildlife halor utei u khla ha shuwa ban aiti sha ki na bynta ka jingsumar bad ban leit pynphai biang na ka jaka ba u wan.
