Shillong, Lber 30:
Ka National People’s Party (NPP) ka la pynpaw ïa ka jingkyrmen skhem ban poi sha ka thong jong ka jingjop ha kane ka ilekshon ka ban wan ha Sohïong konstitwensi.
“Ngin trei shitom bad ïakhun beit ban jop,” la ong u State President ka NPP, Dr. W.R. Kharlukhi ha ka Sngi Palei.
Haba kylli ba ka seng kan hap ïakhun pyrshah ïa ka UDP kaba don lang ha ka Sorkar nalor kiwei-kiwei, utei u nongïalam u la ong ba ha ka por jong ka Sorkar MDA-I, ki la ïakhun pyrshah ha ka ilekshon bad mynta ruh kan long kumjuh.
U la ong ruh ba ka seng ka kyrmen skhem ban poi sha ka thong jong ka jingjop haba phai sha katei ka konstitwensi.
Kum ban shu kdew hangne, ka NPP ha kane ka ilekshon ba la dep ka la jop ha 26 tylli ki konstitwensi ba kynthup ïa 18 tylli na Ri-lum Garo bad 8 tylli na Ri-lum Khasi-Jaiñtia.
Ka Election Commission of India ha ka Sngi Balang ka la pynbna ba ka jingthep ‘vote’ ha Sohïong konstitwensi ban jied ïa u MLA bathymmai kan long ha ka 10 tarik u Jymmang 2023 katba ka jingñiew ïa ki ‘vote’ kan long ha ka 13 tarik Jymmang 2023.
Lah ban kdew ba ïa ka ilekshon ha Sohïong konstitwensi la hap ban pynsangeh noh shwa ha u Rymphang 2023 namar ka jingkhlad noh jong u kyrtong ka UDP, u Bah H.D.R. Lyngdoh.
Dang ha kine ki khyndiat sngi ka UDP ka la jied ïa u Bah Synshar Lyngdoh uba dei u pyrsa jong u Bah H.D.R. ban long kum u kyrtong ka seng.
Nalor u Bah Synshar, kiwei pat ki kyrtong ki ban ïa aireng ha kane ka ilekshon ki long u Bah Samlin Malngiang na ka NPP, u Bah S. Osborne Kharjana na ka Congress, u Bah Sandondor Ryntathiang na ka HSPDP, u Bah Stodingstar Thabah na ka All India Trinamool Congress bad u Bah Seraph Eric Kharbuki na ka BJP.
