Shillong, Lber 30:
Ka kaiphod Comptroller and Auditor General (CAG) ka ri India, ka la pynpaw ba ka pisa kaba la lum kum ka ‘Cess’ kaba kot haduh T.1,193.30 klur naduh u snem 2017-2018 haduh 2021-2022 kam shym la ïaid lyngba ka ‘Consolidated Fund’ jong ka Jylla, hynrei ïa ka Cess kaba la lum da ka Directorate of Mineral Resources (DMR), la leit thep pynban ha ki lai tylli ki nationalised bank kiba kynthup ka SBI, Axis Bank bad HDFC Bank.
Ka kaiphod ka ïathuh ba ïa ka pisa la thep ruh kum ka Fixed Deposit ha Axis Bank bad HDFC Bank.
Ïa kane ka jingleh bakla la pynpaw ha ka State Finances Audit Report, Comptroller and Auditor General of India, kaba dei jong u snem mang tyngka haba kut ka 31 Lber, 2022.
La ong ba ka Meghalaya Environment Protection and Restoration Fund (MEPRF) ka la don lyngba ki hukum ka National Green Tribunal (NGT) ha u Lber 2015 ha kaba la bthah ïa ka Sorkar Jylla ban lum 10 na ka 100 (10%) na ka dor ïew jong u dewïong ha ka shi metric ton. Ka pisa ba ïoh lum na kane dei ban thep ha ka jaka kynshew kaba tip kum ka ‘Meghalaya Environment Protection and Restoration Fund (MEPRF)’ kaba dei ban peit da ka Jylla hapoh ka jingpeit hi jong u Chief Secretary ka Meghalaya.
Kum ka jingbud ïa ki hukum ka NGT, ka tnat Mining & Geology ka Sorkar Meghalaya ka la pynmih ruh ïa ki kyndon ba la pynbeit thymmai (Revised Guidelines) jong ka Meghalaya Environment Protection and Restoration Fund ha u Nailar, 2020 bad ïa kine ki kyndon kiba thymmai la mynjur ruh da ka NGT Committee.
Ka jingpeitngor ïa ka pisa ka dei na ka bynta ban pyntikna ba ka jingpyndonkam ïa ka MEPRF kan long kaba biang, bad ha ka rukom kaba shai bad khuid na ka bynta ban pynbha pat ïa ka mariang ha ki jaka ba la shaktah namar ka jingtih dewïong, ha kaba la donkam ruh ban shim ki lad ïada ïa ka mariang kynthup ka jingïarap ïa ki briew kiba shahktah namar ka jingtih dewïong.
Ka jingpynïaid ïa ka pisa ka dei kaba hap pyllait da ka DMR jong ka Sorkar Meghalaya bad na ka bynta kane, ka mynjur la dep pyntip sha ka Sorkar kaba la aibor hi ïa ka DMR ban plie jaka kynshew pisa la kajong (Current Bank account) na ka bynta ka MEPRF hapoh ka jingpeit jingkhmih u Chief Secretary ka Meghalaya.
Kumta ki kaiphod halor ka kheiñ ka diah, ki ïathuh ba ka ‘Cess’ kaba la lum da ka DMR la thep pynbna ha ki lai tylli ki jaka kynshew pisa kiba don ha ki nationalised banks (SBI, Axis Bank and HDFC Bank) bad ïa ka pisa la thep ruh kum ka Fixed Deposit ha Axis Bank and HDFC Bank.
Namarkata, ka Cess kaba la lum bad kot sha ka T.1,193.30 klur (khlem da kynthup lang ïa ka jingpynlut) naduh u snem 2017-18 haduh 2021-22 kam shym la ïaid satia lyngba ka Consolidated Fund jong ka Jylla.
Ka kaiphod CAG ka ong ba ka jingbym ïaid lyngba ka ‘Consolidated Fund’ kaba la pynlong ban lait ei kine ki jingïoh pisa jong ka Sorkar kiba la lait ruh na ka jingïohi jong ka Ïingdorbar Thawaiñ.
