Shillong, Lber 30:
U Myntri Khynnah ka Sorkar Pdeng uba peit ïa ka tnat Korbar Ri, u Ajay Kumar Mishra u la wan ban sakhi lang ïa ka sngi bakut ba ki 189 ngut ki pulit ophisar kiba la shah hikai pyntbit ha North Eastern Police Academy (NEPA) ki la pyndep ïa ka jinghikai pyntbit kaba 51 ha ki bynta bapher bapher kaba sdang naduh ka 18 tarik Ïaïong, 2022.
Kine ki 189 ngut kiba la shah hikai pyntbit ki hap ha ka 51st Batch Basic Course jong ka NEPA ha kaba la pynlong syndon ïa ka jingpynkut ïa ka jingshah hikai ha ka sngi Palei ha NEPA, Umsaw Khwan, Ri-Bhoi district.
Kine ki pulit ophisar ki kynthup ïa 25 ngut ki Deputy Superintendent of Police (DySP) kita, 2 ngut na Nagaland, 8 ngut na Tripura, 15 ngut na Arunachal Pradesh bad 164 ngut ki Sub Inspectors (SI) kiba kynthup iwei na Tripura, 94 ngut na Arunachal Pradesh, 69 ngut na Assam (APRO Communication). Na kine ki 189 ngut, 12 ngut ki dei ki pulit ophisar kynthei.
Haba ai jingkren ha kane ka sngi, u Mishra u la ai khublei ïaroh ïa kine ki pulit ophisar bad u kitbok ïa ka lawei baphyrnai na ka bynta jong ki, bad ki jait jinghikai kiba ki la ïoh na NEPA kan nang kyntiew ïa kane ka shlem ai jinghikai pyntbit. Kumta u la ïaroh ïa ki sienjam ka NEPA bad ïa u Director u Deepak Kumar uba la trei na ka bynta ban pynneh ïa ka burom jong kane ka jaka ai jinghikai.
Une u Myntri u la kubur ruh ba ka Thaiñ Shatei Lam Mihngi (North East) ka dei kaba itynnad tam ha ka ri bad u ngeit skhem ba kiei kiei kiba kane ka thaiñ don byllai kyrhai kan long ruh ka lad ïa ki briew na kane ka thaiñ ban kloi ban ïakhun ïa kino kino ki jingeh.
U la ban ruh ba ka Sorkar Pdeng hapoh ka jingïalam u Myntri Rangbahduh, u Narendra Modi, ka phaikhmat sha kane ka thaiñ ha ka liang ki kam pynroi bad ki jingpynïasoh la ka dei lyngba ka suiñ, lynti rel, surok nalor kiwei ki jingtei jingshna bad ka rep ka riang.
Shuh shuh u Myntri u la kyntu ïa kine ki pulit ophisar thymmai ba kin burom markylliang ïa kiwei bad kloi ban ïada ïa ki hok jong ki nongshong shnong kiba la kdew ha ka riti synshar jong ka ri.
Haba ai khublei ïa kine ki ophisar, u Mishra u la sam ruh ïa ki khusnam sha kito kiba la wan kham shakhmat eh napdeng baroh kito kiba la shahhikai pyntbit ha NEPA.
Naduh ba la seng ha u snem 1978, ka NEPA ka dei ka shlem ai jinghikai pyntbit ïa ki pulit ophisar kaba la lah ban pyndep 50 tylli ki jinghikai sha ki 4,456 ngut kiba shah hikai kiba la pyndep na kane ka shlem ha kine ki 45 snem.
Kine kiba shah hikai ki la pyndep ïa ki jinghikai ha ki bynta bapher bapher kynthup ha ka Police Science, Legal Studies bad Social Science, ki jinghikai ïa ka Drill, ki tiar siat ne Weapons Training, ka jingbiang ka met ka phad ne Physical Efficiency, nalor ki buit kumno ban khynra lane Police Operations and Tactics. La ai jinghikai kyrpang ruh shaphang ka jingshahktah ha ki bor ka mariang bad kumno ban leh, nalor ka jingsumar ïa kiba mynshwa bad ki kyndon ñiah kali bad kiwei kiwei kum ka jingsah ha khlaw ha ryngkat ki buit ban wad ne khynra bad kurup, bad ban ïakhun pyrshah ïa kiba thombor ha ka jingïakhun.
Ki la ïoh jinghikai ruh ban ïashimbynta ha kiwei pat ki kam la ka dei ha ka kren ka khana, jingïatai, shondur, jingkyntip, jingïalehkai, ki kam imlang sahlang, bad kiwei kiwei ki jingïakop kiba la shimbynta shitrhem bha da kine ki pulit ophisar.
Kine kiba shah hikai ki la ïashimbynta ruh ha ka Post Graduate Diploma halor ka ‘Police Administration and Investigation’ na Sardar Patel University of Police, Security and Criminal Justice, Jodhpur. Ha NEPA, la ju ai jinghikai ruh ïa ki pulit ophisar kiba dei na ki ri kiba marjan, kum ka Bangladesh bad Myanmar.
