Shillong, Lber 31:
Ka Meghalaya High Court ha ka Sngi Thohdieng ka la pyntip ba la buh da ka jingtohkit bathymmai ban pynshisha la ka don ne em ka jingsiew tam ïa ka pisa kum ka bai lutksan na ka bynta ka khyndew ba la thied shuh ban pynheh ïa ka kad liengsuiñ kaba don ha Umroi.
Haba shong bishar halor ka mukotduma ba la ai da ka Kong Steid Dkhar kaba la kyrpad na ka High Court ba kan ailad ïa ka ba kan peit bniah ïa ki kot ki sla kiba ïadei bad ka jingthied khyndew shuh ban pynheh ïa katei ka kad liengsuiñ, ka ïingbishar ka la ong ba hadien ka hukum jong ka Supreme Court, ka High Court ka la thung da ka jingtohkit ba la khlieh da u District Judge ha Ri-Bhoi.
Ka jingthmu jong ka jingtohkit ka long ban pynthikna lada ka don ne em ka jingsiew tam ïa ka bai lutksan sha ki trai kiba la die ïa ka khyndew na ka bynta ban ïoh pynheh ïa ka kad liengsuiñ ha Umroi. Hadien ba la peit bniah ïa ka kaiphod jong u District Judge, la shem ba kam pat biang satia namar ka jingtohkit ka khlem pynpaw la ka la don ne em ka jingsiew pisa tam sha ki nongdie khyndew bad kam shym la wad jingtip haduh katno la siew tam.
Namarkata, ha ka 21 tarik Rymphang, 2023, ka High Court ka la ai hukum ban leh da ka jingtohkit ka bathymmai da u District Judge, Ri-Bhoi uba mynta ban pynthikna la ka la don ne em ka jingsiew tam ïa ka pisa sha ki nongdie jaka bad haduh katno kata ka jingsiew tam ka long. Ïa mynta, ka jingtohkit da u District Judge ka dang ïaid.
Ka High Court ka la ong ba ha ka jingtohkit, lada lap ïa uno-uno uba la leh bakla, uta u dei ban ïoh ïa ka lad ban peit ïa ki kot ki sla bad ban pdiang ne kyntait ïa kita. Namarkata, ka High Court ka la pdiang ïa ka jingkyrpad jong ka Kong Steid Dkhar bad ka la bthah ïa u Registrar General ban aiti lut ïa baroh ki kot ki sla kiba ïadei bad katei ka jingtohkit sha u District Judge, Ri-Bhoi.
Kane ka jingaiti ïa ki kot ki sla ka dei ban hap pyndep noh ha kane ka taïew, bad lada u District Judge, Ri-Bhoi, u la ïoh pdiang ïa kita ki kot ki sla, kan shong ha u ban ailad ïa baroh kiba ïadon bynta ban peit bniah ïa ki kot ki sla bad ban ai lem sha ki ruh ïa kita ki kot ki sla lada ka long kaba donkam.
Hynrei ka High Court ka la pynshai ba kane ka hukum ba mynta ka sngi kan ym khang lad ïa u District Judge ba un pyndonkam la ka jong ka jingsngewthuh halor katei ka bynta.
