Shillong, Lber 31:
U Director General of Police (DGP), u Dr. L.R. Bishnoi ha ka Sngi Thohdieng u la ong ba ka jingtohkit haba ïadei bad ki kam khaïi briew ka long kaba jwat bad ka jingrai pynrem halor ki mukotduma ka duna shaba palat haba ïanujor bad kiwei-kiwei.
“Ka kam khaïi briew ka don lai bynta – ka kam, ka jingpynpoi na kawei ka jaka sha kawei pat bad ka daw. Ki don bun bah ki daw balei ki briew ki ïadon bynta ban ïadie-ïathied para briew. Kine ki kynthup kum ka jingpyndonkam na bynta ki kam die met, ka jingpyntreikam jubor, kam khrong, kam khaïi drok, ka jingdie ïa ki dkhot met, ka jingpyntrei ïing briew bad kiwei-kiwei,” la ong u Dr. Bishnoi.
U DGP u la ai jingkren ha ka ‘Workshop’ ba shi sngi halor ka ‘Anti-Human Trafficking’ ba la pynlong da ka tnad CID jong ka tnad pulit ka Jylla.
U la kdew ba haba ïadei bad ki kam khaïi briew, lada u IO u lah ban pynshisha hapoh ïingbishar, kata lah ban rai pynrem halor kata ka mukotduma watla ka long kaba jwat namar kam long kaba suk ban pynshisha halor kitei ki 3 tylli ki bynta.
U la ïathuh ruh ba nalor ka IPC bad ka ‘The Immoral Traffic (Prevention) Act’, 1956, ki dang don shuh kiwei pat ki aiñ bad kumta u IO u hap ban tip shai ïa ki kyndon jong kitei ki aiñ.
“Kumta ka jingtohkit ka long kaba kham jwat haba ïadei bad kine ki mukotduma bad ka jingrai pynrem ruh ka duna bha,” u la ong.
Haba kren ïa ka Jylla, u Dr. Bishnoi u la ong ba lada phai dien ïa ki jingkheiñ kiba 6 snem mynshuwa, ki don tang 19 tylli ki kam khaïi briew kiba la pynngat mukotduma bad na kitei, tang kumba 3-4 tylli ki mukotduma la rai pynrem.
“Te phi lah ban sngewthuh ba ka long kaba jwat bad kaba eh bha haba nujor bad kiwei pat ki mukotduma kiba la khmih bniah katkum ka IPC,” u la ong.
U DGP u la pynsngew ruh halor ki sienjam ba la shim da ki bor Sorkar kum shi bynta ban tehlakam ïa katei ka kam be-aiñ ba kynthup ïa ka ‘Women’s Safety Division’, ki ‘Anti Human Trafficking Unit’ (AHTU) ha man la ki Jylla nalor kiwei-kiwei.
Ha kajuh ka por, u la ïathuh ïa ka khana kumno mynba u dang shakri ha Assam ba ka kynhun pulit ka la ïoh ban pyllait im ïa katto-katne ki khynnah kynthei kiba na ka Thaiñ Shatei Lam Mihngi na Myanmar.
Na ka liang utei u heh pulit u la ong ba ki briew kiba donkti ha ki kam khaïi briew ki kynthup ym tang ïa kito ki kynhun runar kiba napoh ka Jylla, hynrei kito ki kynhun runar kiba nabar ri kumjuh.
“Ngi dei ban buh jingmut ïa 2 tylli kiei-kiei – ki lanot kiba ngat ha kitei ki kam be-aiñ ki wan na ki longïing ba duna ka ïoh ka kot katba kito kiba donkti ha kitei ki kam be-aiñ ki dei ki briew kiba donbor ha ka imlang-sahlang,” u la ong.
Shuh shuh u la bynrap, “Nga sngewkmen ban pyntip ba hadien u 2016, u snem 2016 u long u snem uba sniew ïa ka Meghalaya, kumjuh ïa kiwei-kiwei ki Jylla ka Thaiñ Shatei Lam Mihngi ha kaba ki mukotduma khaïi briew ki la kiew bha. Hynrei hadien ka 2016 ha Meghalaya, kane ka la hiar, wat la dang don hi ka jingkiew ha katto-katne ki bynta jong ka ri khamtam hadien ka COVID-19 kaba la ïalam sha ka jinghiar ha ka ïoh ka kot.”
Nalor kane, u Dr. Bishnoi u la ban jur halor ki prokram jingai jinghikai bad ka jingïatreilang hapdeng ki nongshong shnong ba don ka jingkitkhlieh khnang ban rat dyngkhong ïa kane ka jingsniew.
Ha kane ka sngi la ïoh ruh ïa ka jingkren na ka Director, Meghalaya State Judicial Academy, Kong K.M.L. Nongbri bad ka Chairperson ka MSCPCR, Kong Ïamonlang Syiem.
