Shillong, Lber 31:
Ka kait kaba pynmih da ki nongrep na Rilum Garo ka dei kaba la bna nam, hynrei ïa ka jingpawnam ha India bad ha kiwei ki ri ïoh pynban da kawei ka ïew die kait kaba don ha Goalpara district ha Assam kum ka ïew die kait kaba heh tam ha dewbah Asia.
Ka kait kaba bun jait, ka dei kaba la thung bad pynmih da ki nongrep na North Garo Hills district bad East Garo Hills district bad la ju leit rah ban die ha ka ïew kaba kyrteng ka Daranggiri ha Goalpara district kaba don ha khappud Meghalaya bad Assam.
Kane ka ïew die kait ha Daranggiri ka la ïoh ïa ka nam kum ka ïew die kait kaba heh tam ha dewbah Asia.
Ki nongrep kait kiba na North Garo Hills district kiba kynthup na Mendipathar, Resubelpara, Kharkutta bad Bajengdoba bad na East Garo Hills ki leit rah ïa ka kait jong ki ban die ha ïew Daranggiri tangba kim ïoh pat ka dor kaba biang, namar ki shah khñiot dor ha ki nongkhaïi kiba thied ha ka dor katba mon maki.
Na ka liang u MLA ka Kharkutta konstitwensi, u Rupert M Momin u la pynpaw ka jingsngewkhia halor ka jingbymbiang ka ïew die kait ha North Garo Hills district bad u la ai jingmut ïa ka Sorkar Jylla ban don noh da ka ïew kaba paka khnang ba ki nongrep kin ïoh ka dor kaba biang haba ki die ïa ka kait bad ki nongthied kait ruh ki hap ban wan thied beit na Rilum Garo ym shuh na Daranggiri.
U Momin u la ong ba ka kait mynta la sdang ban die ha kawei ka ïew kaba rit ha Adokgre kaba don ha Kharkutta kaba jngai kumba 20 km na Daranggiri, bad na Adokgre la sdang phah ruh ïa ka kait sha kiwei ki Jylla kum sha Bihar, Odisha, West Bengal bad Nepal, namar ym shym la leit rah shuh ïa ka kait sha Daranggiri kaba ha Assam.
La ïathuh ba ka kait ha ka ïew Daranggiri ka ju ïaid ïew bha bad kaba kham shongshit ka dei ha ka por ba don ka tamasa lehniam kum ka Diwali bad Chhat Puja bad ka kait na Rilum Garo ka mih kham bun ha ka aïom synrai hapdeng u Nailur bad Risaw.
Une u MLA ka Kharkutta u la ïathuh ruh ba ki nongrep kait ki shu ap tang ha ka jingisynei jong ki nongkhaïi khamtam lada ki thied ha ka dor kaba kham rem.
U Momin u la ong ba u la dep ïakren bad u Myntri Rangbah u Conrad K Sangma bad un sa kren ruh ïa ka Myntri ka rep ka riang ka Kong Ampareen Lyngdoh.
U la ong ba ka ïew kaba paka ka dei ban don ha North Garo Hills bad dei ruh ban donlang ki jaka buh ba donlang bad pyndait thah ïa ki kynja soh ba kin nym pyut bad long ka jingmyntoi ïa ki nongrep namar 90 na ka 100 ki nongrep kait kiba leit die ha ïew Daranggiri ki dei na Rilum Garo, katba tang 10 percent ka kait ka dei kaba mih ha Goalpara district.
