Nongstoiñ, Lber 31:
Ka Federation of Khasi Jaiñtia & Garo People ( FKJGP) West Khasi Hills ka la pynpaw ïa ka jingsngewkhia kaba jur hadien ba ki pulit Assam ki la kem ïa 2 ngut bad thwet ruh ïa ki 25 ngut ki nongshong shnong ka Malchapara, ka shnong kaba la shah pynhap sha Assam mynta la katto-katne taïew .
Ki nongkitkam ka FKJGP ki la pynpaw ba kumno ka Sorkar Jylla ka pynlong ïa ka jingpynsngew paidbah bad hato ka Sorkar ka la pyndep hok ha ka ban sngap ïa ka jingsngew u paidbah uba sah ha khappud, namar kumba ka long mynta, ka Malchapara ka don 108 ïing; kiba kwah don ha Meghalaya ki long 78 ïing katba ki 35 kiwei pat ki kwah leit sha Assam.
Ki la ong ruh ba katkum ka Regional Committee kaba lah khlieh da u Bah Renikton Lyngdoh Tongkhar hapoh ka Sorkar MDA kaba la dep, ka lah kren shai ba kan sngap ïa ka jingkwah u paidbah, hynrei hangne ka kylla khongpong bad kane ka pynpaw ba ka Sorkar kam shym la sngap ïa ka jingkwah u paidbah, hynrei ka la shu leh ha la ka mon.
“Ka FKJGP ka dawa na kane ka Sorkar kaba mynta (MDA-II), ïa ka Regional Committee hapoh ka jingïalam jong u Bah Paul Lyngdoh, Myntri Sorkar ba ka dei ban leit jurip biang bad ban phai dien biang ïa kine ki jaka ba don ka jingïapynbeit bad ruh ym shuh ban shu leh thurmur namar ka jingduhnong hi ka long ïa ngi,” ki la ong da kaba bynrap ba namar kumba long mynta, barabor hapoh Meghalaya hi u ju heh beit u nombor barit ha man ki kam, kumba long mynta ha Malchapara, ka Sorkar ka kham sngap ïa u 35 ban ïa u 78.
Nangta ki la ong ruh ba ka FKJGP haba ka la ïoh ban ïakren bad ki nongshong shnong, ki Rangbah Shnong bad u Secretary ka Hima, ka pynpaw ba kum ka seng kan ïeng bad snohktilang ha ka ban ïaleh ha kane ka jingïaleh bad ruh ban ïada ïa u pud u sam jong ka hima.
“Ka Sorkar kam dei ban shu sngap mynthi lane leh katba mon, hynrei ka dei ban da peit bha shwa ïa kiei-kiei kumba ka ju eksamin ïa kiba bun ki mat namar ïa kiba bun ki mat la shu kut tang ha ka eksamin, hynrei ïa kane ka mat pat la shu eksamin kyrkieh bad ka la bakla,” la ong ki nongkitkam ka FKJGP.
Kumta ka FKJGP ka dawa ïa ka Sorkar ba kan shimkhia ïa kane bad leh eiei namar man ka por, ka Assam ka lah shu thombor khamtam ïa ki paidbah kiba sah hapoh u pud u sam jong ka hima Khasi – kata ka Hima Nonglang Sirdarship.
Shuh shuh ki la bynrap ba ka FKJGP kan ym shong kli kti, hynrei kan ïaleh katba lah ban ïada ïa la ka jong ka jaka bad ruh ba kan ïatreilang bad ki briew ka hima.
