Shillong, Lber 31:
Ka Meghalaya High Court ha ka Sngi Thohdieng ka la pynpaw ïa ka jingsuba ba ka jingtap ïa ki trok kiba kit mar kit mata ka dei namar ban buhrieh ïa ka jingkit ïa u dewïong, bad kam dei eh ban pynthikna ïa ka jingdon ka jingshngaiñ.
Ïa kane, ka High Court ka la pynpaw haba bishar ïa ka jingdon jong ki trok kiba kit palat pud bad ka jingduna ki jaka thew lane ki ‘weigh bridge’ jong ka sorkar jylla.
Ha kane ka sngi, ka ïingbishar ka la pynpaw ba wat la ka sorkar ka la ai bun tylli ki kaiphod bad na ka liang u nongmudui u la ban jur ba dang duna ka jingpeit bniah ïa ki trok kiba kit palat pud ha ki surok ha ka jylla, kam pat shym la don kano-kano ka jingkylla.
Ha ka kaiphod jong ka sorkar, la pynpaw ba ki don kumba 16 tylli ki jaka thew kiba treikam ha baroh kawei ka jylla, bad ha u bnai ban wan, ka jingdon ki jaka thew kiba treikam kan kiew sha ka 23 tylli. Mynta ka sngi, ka sorkar ka la pyni ba 19 tylli ki jaka thew ki treikam bad sa saw tylli kin sa treikam hapoh ar taïew eiei.
Ha kajuh ka por, ka ïingbishar ka la ong ba ha kiba bun ki bynta jong ka jylla khamtam ha ka thaiñ Pynursla, Shella, Dawki bad Nongstoiñ, ki don bun bah ki kali kiba kit maw bad shyiap haduh ban da dap smam, hynrei kam shym la don kano-kano ka jingpeitngor ïa ki.
Wat lada khlem don ki jaka thew, ka High Court ka la ong ba ka paw shai ba kum kitei ki kali, ha kaba don napdeng jong ki ki bym don tang ki nombor kali, ki kit palat pud. Hynrei ka la ong ba ki bor sorkar ki phai da kynriang wat haba ki don kum kine ki kali kiba kit shaba palat ban ïa kaei kaba la shah.
Shuh shuh ka la ong ba ki don ki bynta khamtam ha Pynursla ha kaba la ïohi ba da ki hajar tylli ki trok ki pynïeng ha kajuh ka por, bad kine ki trok ki dei kiba thmu ban kit maw bad shyiap sha Bangladesh, bad lehse ym don wat tang kawei ka trok ruh kaba bud ïa ki kyndon.
Ha kiwei pat ki jaka, ka High Court ka la ong ba ki don ki trok kiba kit palat pud ïa ki dieng. Ka la ong ba lehse ka lah ban don ka jingkylla ha ki kali kiba kit ïa ki mar ki mata namar la tap bha ïa ki, hynrei la suba ba kane ka jingtap ka dei tang ban ïoh burieh ïa u dewïong uba la kit bad ym dei eh ban pynthikna ba kan don ka jingshngaiñ.
“Ha ka jingshisha, ki kali kit maw ki long kiba I triem shisha ban peit, bad lada ki pynïeng kynsan, ki maw kiba don halor ki lah ban tyllun lut shadien bad pynjulor ïa ki kali kiba bud lane ka lah ruh ban ïalam sha ka jingïap jong ki nongïaid lynti,” la ong ka High Court.
Ka sorkar ka la pynpaw ba ka la pynkhreh ïa ka saiñdur, bad lada thied ïa ki kor ki bor ban thew, ka dor kan long kumba T. 27 lak eiei. Hynrei ka High Court ka la ong ba ka sorkar kam dei ban ai daw ban pynbiang ïa ki jingdonkam ban peitngor ïa ki kali kiba kit palat pud khamtam haba pyrkhat ïa ka jinglut ban shna surok bad kiwei.
Ka High Court ka la ong ba ki Superintendent of Police (SP) ha baroh ki distrik ki dei ban ïoh jingtip kaba shai bad dei ban hukum ïa ki ban peitngor ïa ki kali kiba kit palat pud wat lada donkam ïa ki ban don ha surok. Shisien ba la leh kumne, bad lada la lah ban pynsangeh ïa ki katto katne ki trok kiba kit palat pud bad ban ym shah ïa ki ban ïaid khlem da pynhap shwa ïa kato ka jingkit kaba tam, lehse kan pynlong ïa kiwei ki trok ruh kin hap ban bud ryntih ïa ki kyndon.
Ka ïingbishar ka la pynpaw ïa ka jingsngewdiaw ba ka sorkar jylla ka khlem pat leh ïa kano-kano ka kam ka bakhraw ban peitngor ïa ka jingïaid ki kali kiba kit shaba palat. Hynrei ka la shu pynpaw ïa ka jingkyrmen ba ka sorkar kan leh eiei bad ka dei ban ai da ka kaiphod hashwa ka 3 tarik Jymmang, 2023.
