Nongstoiñ, Lber 31:
U President ka Khasi Students’ Union (KSU), samla Lambokstar Marngar u la ong ba ki khun samla kim dei shuh kiba dang sahdien ha ka pule-puthi, hynrei ka jingsahdien ka dei na Secretariat namar kam don ïa ki mat treikam kiba biang ban pynbha ïa ka pule-puthi.
Ïa kane na ka liang u samla Marngar u la pynpaw haba kren ha ka 31 tarik u Lber ha ka jingïalang plie paidbah ïa ka shlem treikam ka KSU Mawshynrut Circle kaba don hapoh Mawthengkut jong ka Mawshynrut Civil Sub-Division.
U la long ruh u kongsan ban plie ïa katei ka ophis ha ryngkat ka jingïadonlang ki dkhot bad nongkitkam ka KSU, ki nongïalam barim ka seng, ki ’riew rangbah bad kiwei-kiwei kiba la shah khot sngewbha.
Ha katei ka sngi ka KSU ka la ïoh ruh ban pynkup burom ïa ki samla pule kiba la wan shakhmat ha ki jingpule bapher-bapher lyngba ka Maitshaphrang Academic Award 2023 ïa kaba ka KSU ka ju leh man la u snem kum shi bynta ban ai mynsiem ïa ki samla pule ka dong ka thaiñ.
Utei u samla nongïalam u la ong ba na ka liang ka seng ka ju bthah bad ai jingmut sha ki shnat treikam bapher-bapher ba kin buh ïa ka pule-puthi kum kawei na ki mat kaba hakhmat eh.
Shuh shuh u la ong ba ka KSU ka la sdang ïa kum kane ka sienjam ban ai ka jingithuh ba kyrpang ïa ki samla pule kiba wan shakhmat ha ki kyrdan bapher-bapher ka la sdang naduh u snem 1993. Ka dei ruh lyngba ka jingsdang jong ka KSU ba wat ka Sorkar ha ki snem kiba kham hadien ruh ka la sdang ban bud ïa kajuh ka sienjam ba ka KSU ka la leh.
U la ong ruh ba katei ka jingpynkup burom jong ka KSU ïa ki samla pule ka long kum shi bynta ban pyrsat mynsiem ha ki ïa kata ka jingtrei shitom jong ki ba ka KSU ka kwah ban ithuh bad ba kin long kita ki atiar jong ka jaidbynriew.
U la kdew ba ka jingïaid lynti ka long kaba la jlan kat haduh ba ka Mawshynrut Circle kan ïoh ïa ka ophis treikam kaba pura bad u la kyntu ruh ïa ki nongkitkam ka KSU Mawshynrut Circle ba kin long hapoh jong ki Dorbar Shnong ban ïatreilang ha kiba bun ki liang.
