Nongpoh, Lber 31:
Kum shi bynta ban pynsngewthuh paidbah halor ka jingñiah kali ban shngaiñ ka leit ka wan jong ki paidbah, ka ophis jong u District Transport Officer (DTO) ka Ri-Bhoi District ha ka Sngi Thohdieng ka la pynkut noh ïa ka jingrakhe jong ka taïew ‘Road Safety Week’ kaba la sdang naduh ka 27 tarik u bnai Lber, 2023.
Ïa kane ka prokram la pynkut hakhmat ka phyllaw jong ka ophis u DTO ka Ri-Bhoi ha Nongpoh lyngba ka prokram kaba la wan ban ïadon bynta lang naduh u SDO ka PWD Nongpoh, u Bah D. Shylla, u Dr. N Kharnaïor na ka Civil Hospital, Nongpoh, u Traffic In-charge ka thanad Nongpoh, u Bah D.S.R. Lakiang, u DTO ka Ri-Bhoi, Bah V.R. Ryngkhlem, u Enforcement Checker, Bah Dawa T. Warjri nalor ki nongkitkam jong ki nongñiah kali kamai taksi, Sumo bad kiwei-kiwei.
Kumban shu pynkynmaw, ka ophis jong u DTO Ri-Bhoi haba rakhe ïa ka ‘Road Safety Week’ kaba la sdang naduh ka 27 tarik u bnai Lber, 2023, ka la ïoh ban pynlong ia shibun ki jait prokram ban pynsngewthuh paidbah halor ki aiñ ki kanun kiba ïadei bad ka rukom ñiah kali ha ki surok na ka bynta ban shngaiñ ka leit ka wan jong ki paidbah.
Katto-katne na ki prokram kiba ka ophis jong u DTO ka Ri-Bhoi ki la dep ban pynlong ha kine ki sngi ki kynthup ïa ka jingsam ïa ki kot lyngkdop halor ka rukom ñiah kali, ka jingpynlong ïa ki jingïalang ban pynsaphriang khubor halor jong ki kyndon bad ki rukom ban ñiah kali, ka jingkhmih bniah ïa ki kali ba pynmih tdem, ka jingïaid ‘rally’ da ki kali bad ka jingpynlong ïa ka prokram ban peit bniah ïa ki khmat jong ki nongñiah kali da ki doktor kaba ym donkam siew satia.
Haba ai jingkren ha kane ka sngi, ki ophisar bad doktor ki la ong ba ka jingbun jong ki jingjia aksiden kali ha kine ki sngi ka la jur bha, kaba la wanrah ruh ïa ka jingduh noh ïa ki mynsiem briew khlem dei por bad ong ruh ba kane hi bunsien ka dei ka jingniah torti khlem da bud ryntih ïa ki kyndon ban ñiah kali.
Kawei na ki bynta ba ki nongkren ki la ban jur ka dei halor ka jingñiah sted ïa ki kali bad ka jingïaknieh ban jam shakhmat khlem da bud ïa ki kyndon lane ki rukom ñiah kali, kaba la wanrah pynban ïa ki jingjia ba sngewsih tang namar ka jingkwah ban poi kloi sha ki jaka ban ki leit khlem da pynleit jingmut ne bud ryntih ïa ki rukom ñiah kali kiba la buh ryntih da ka tnad pynïaid kali jong ki bor pulit.
Ha kajuh ka por, na ka liang ki nongkren, ki la buh ruh ka jingkyntu kynpham sha ki nongñiah kali ba ki dei ban long kiba phikir bad ong ruh ba haba ki bat ïa u ‘steering’ jong ka kali, ka jingim jong ki nongleit nongwan ka shong ha ki, kumta ki dei ban long ki ba don ïa ka jingkitkhlieh ban ñiah don akor bad ñiah ha ka rukom kaba dei ban ym wanrah ïa kano-kano ka jingjia ba sngewsih da kaba ym dei ban pyndonkam ïa ki ‘mobile phone’ ha ka por ba ñiah kali, ban pyndonkam ïa ki ‘signal’ jong ka kali ha ka rukom kaba dei bad ban ym leh kyrkieh ne ñiah khlemakor.
