Shillong, Lber 31:
Ka seng United Democratic Party (UDP) ha Pynursla konstitwensi ka la shah ktah jur hadien ba ka la leit ban ïatreilang bad ka National People’s Party (NPP) ha ka sorkar MDA 2.0.
Haba ïakren bad ki katto katne ki nongïalam ka UDP Pynursla Circle, ki la ong ba ka long ka jingsngewsih ba ka UDP seng kmie ka la rai ban leit ïatreilang bad ka UDP. Ki nongïalam ki la ong ba kim sngewïahap ïa ka jingleh jong ki nongïalam ka UDP seng kmie khamtam ba ki khlem sngap lem ïa ka sur jong ki paidbah kiba pyrshah ban don ka jingïatreilang bad ka NPP ha ka sorkar.
Ki la kdew ba ha ka jingïalang ba dang shen jong ka UDP Lapalang Unit, ka la don ka jingïakren kaba sani bha halor katei ka rai ban ïatreilang ha ka sorkar MDA 2.0. Hadien ka jingïakren, ki nongïalam bad ki nongkitkam ka UDP ha Lapalang Unit ki la rai ban iehnoh ïa kane ka seng na ka daw ba kim sngewïahap jingmut ïa ka rai ban ïatreilang bad ka NPP khamtam namar ha ka ilekshon, kine ki artylli ki seng ki la ïather iwei-ïa-iwei pat tangba mar ïa dep ka ilekshon, ki la poi sha kajuh ka sem ban ïatreilang.
Nalor ka Lapalang Unit, ka khubor ba la ïohlum ka ïathuh ba ki don sa kiwei pat ki shnat treikam ka UDP ha Pynursla ki bym sngewïahap jingmut bad ka jingleh jong ka UDP seng kmie.
“Wat lada ki khlem lah ban thaw da ka sorkar kaba ïalam da ki seng riewlum, ka UDP ka la dei ban shong noh ha ka liang pyrshah namar ka por jong ka jingkylla kan wan katkum ka mon jong ki paidbah,” la ong ki katto katne ki nongïalam.
Shuh shuh ka khubor ka ïathuh ba ki nongïalam bad nongkitkam ka UDP Pynursla Circle kin sa shong jingïalang ha kine ki khyndiat sngi ban wan ban ïakren halor ki mat ki jura kiba ïadei bad ka seng bad ka jinglong jingman ka saiñ hima sima hapoh Pynursla bad kumjuh ruh ha ka jylla.
Ka UDP, ha kane ilekshon MLA ba dang shu dep long shen, ka la pynïeng da u Bah Anthony Kongwang ban ïakhun pyrshah ïa u Symbud Myntri Rangbah, u Bah Prestone Tynsong. Hynrei u Bah Kongwang u la shah pynliem ha u Bah Prestone da kumba 8,000 vote eiei.
