Nongstoiñ, Ïaïong 02:
Ki 25 ngut ki nongshong shnong ka Malchapara, ka shnong kaba la shah pynhap sha Assam ha ka jingïapynbeit pud jong ka kylla ba nyngkong bad kiba la shah thwet ha ki pulit Assam ha kine ki sngi ba la dep, haduh mynta ki dang shong rieh bad sah hi ha shlem treikam jong ka Hima Nonglang Sirdarship.
Katkum ka khubor na ki nongïalam hima, la ïathuh ba ha ka 2 tarik u bnai Ïaïong, 2023 u MLA ka Rambrai-Jyrngam, u Remington Gabil Momin u la leit sha ka shlem treikam jong u Sirdar ka Hima Nonglang Sirdarship, West Khasi Hills ban noh ka jingïarap sha kitei ki 25 ngut kiba la ïoh jaka rieh shi por na u Sirdar ka Hima Nonglang.
La ban kdew hangne ba kitei ki nongshong shnong kiba la shah thwet ha ki pulit Assam ki la leit ban rieh bad sah ha katei ka shlem treikam ka Hima Nonglang naduh ka 28 tarik u bnai Lber, 2023 ha kaba 13 sngi mynshuwa, ki la hap ban shu phet wir sha khlaw sha btap.
Kumta hadien ba u Sirdar ka Hima Nonglang u la ïoh jingtip ïa katei ka jingphet wir jong ki Khun ki Raïot haduh 13 sngi, u la phah ïa u Secretary ka Hima, u Bah Birbor Riangtem sha ka shnong Malchapara ban leit khmih ïa katei ka shnong.
Na ka liang ki nongïalam ka hima ki la ïathuh ruh ba ha katei ka sngi ïa kaba utei u MLA u la leit ban jngoh, u la ïoh ban noh synñiang ïa kitei ki briew da u khaw, shini, dai, phan, ki jingbam bad kiwei-kiwei ha ryngkat ka pisa T.10 hajar tyngka sha kitei ki briew ha ka jingdonlang u Secretary ka Hima Nonglang bad u Myntri ka Hima.
Shuh shuh ki nongïalam ka hima ki la pyntip bad ong ruh ba ha kaba ïadei bad ka jingtyngkhuh bad ka jingleit mih sha thanat Boko halor ka ‘Anticipatory Bail’ jong kitei ki 25 ngut lashai ka sngi, la hap ban pynkylla noh ïa ka tarik ban leit pynlong ‘rally’ hakhmat ka Secretariat kumba la buh por ha ka 28 tarik u bnai Lber, 2023 sha kawei pat ka sngi bad ïa ka tarik yn sa pyntip.
Kumta na ka liang ki nongïalam ka Hima Nonglang ki la kyrpad ïa ki paidbah, ki kynhun seng, ki nongsynshar Hima ka Bri u Hynñiewtrep ban ïai shah haduh ban da pyntip da kumwei pat.
