Kolkata, ïaïong:
Ha kane ka por ba ka kynhun nongïalam jong ka seng Trinamool Congress ka la wer na ka bynta ki kynhun pyrshah ban ïatylli ban ïakhun pyrshah ïa ka sorkar Bharatiya Janata Party (BJP) kaba ïalam ïa ka sorkar kmie, ki seng ka liang pyrshah ha West Bengal ki la wan ha kawei ka kynhun ban pyrshah ïa ka sorkar Trinamool ha ka jylla.
Kumba la sakhi, la ong ba ha ka sngi Palei jong ka taïew ba la lah, ka Myntri Rangbah jong ka jylla ka Mamata Banerjee ka la wer na ka bynta ka jingïatylli jong ki seng ka liang pyrshah ha ka por ba la don ka jingïakhih ha Red Road, ki nongïalam jong ka seng Communist Party of India (Marxist) u Mohammad Salim, Bikash Ranjan Bhattacharya bad u Sujan Chakraborty ki la ïashim bynta ha ka jingïakhih jong ki nongtrei sorkar ha ka jylla, ha kaba la ïaid mynta la ar bnai, ban dawa ïa ka DA (Dearness Allowance) na ka bynta ki nongtrei ka sorkar kmie. Kham hadien la lah ban ïohi sa ïa u nongïalam jong ka liang pyrshah bad u nongïalam jong ka seng BJP u Suvendu Adhikari ba u la don ha katei kajuh ka jaka.
Hadien kane, u nongaiktien jong ka seng Congress u Koustav Bagchi ruh u la don bynta lang ha ka jingïakhih jong ki nongtrei.
Kane kam shym dei ka sien kaba nyngkong na ka bynta ki seng ka liang pyrshah ha West Bengal ba kin wan ha kawei ka rynsan ban pyrshah ïa ka sorkar Trinamool Congress.
Ha ryngkat ka jingsam lang ïa ka rynsan bad ki nongtrei kiba la pynlong ïa ka jingïakhih, ki nongïalam jong ka seng BJP, ki kynhun Left bad ka seng Congress ki la ïai don bynta ban ai ka jingkyrshan ïa ki jingïakhih jong ki nongthep kam ban pyrshah halor ka jingdon jong ka kam bamsap kaba la mih na ka jingthung kam ha ki skul ba la pynïaid da ka sorkar jylla. Ki seng ka liang pyrshah ki la ïatylli ha kaba kane ka la ktah jur ïa ka seng Trinamool.
Naduh ka jingpynlong ïa ka ilekshon Cooperative ha Nandakumar ïa kaba la pynong ha u Naiwieng jong u snem 2022 shaduh ka ilekshon shiteng samoi jong ka Sagardighi ha u Lber jong u snem 2023, ka jingïasngewthuh jingmut jong ka liang pyrshah ka la paw na ka bynta ban ïakhun pyrshah ïa ka seng Trinamool Congress, kaba la bat ïa ka jingsynshar ha ka jylla ha ki 11 snem ba la leit.
Ha ka por ba ka liang pyrshah ka la wan ha kawei ka kynhun, u Adhikari u la kyntu ïa ki seng ka liang pyrshah ha West Bengal ba ki la dei ban pyntikna ha ka ban ym ai vote da lei-lei ruh na ka bynta ka Trinamool Congress.
