Shillong Ïaïong 03:
Ka United Democratic Party (UDP) kaba la donlang ha ka Sorkar synrop bad ka National People’s Party (NPP) ka la pynpaw ka jingsngew skhem ba ka seng kan ïoh jingjop na Sohïong konstitwensi ha kane ka ilekshon namar ba ki paidbah ki phaikhmat sha ka seng bad ki kynmaw ruh ïa ki kam ba radbah bad ki jingnoh synñiang jong u MLA barim uba la khlad noh, u Bah HDR Lyngdoh.
Haba ïakren bad u President ka UDP, u Bah Metbah Lyngdoh u la ong ba ka UDP ka don ka jingkyrmen ban ïoh ïa ka jingjop ha kane ka ilekshon, namar ba ma u kum u nongïalam ruh u la ïoh jingtip na ka konstitwensi ïa ka jingsngew jong ki paidbah ban ailad ïa ka UDP ha kane ka sien kaba mynta.
Ka UDP ka la pynbna ïa u Bah Synshar Lyngdoh kum u kyrtong, uba dei u pyrsa jong u Bah HDR.
Ka jingthep vote ha Sohïong kaba dei ban long ha ka 27 tarik Rymphang, la pynsangeh noh namar ka jingkhlad u Bah HDR Lyngdoh ha ka 20 tarik Rymphang.
U Bah Metbah u la ong ba ki paidbah ki don ka jingsngew na ka bynta u Bah HDR ha kane ka ilekshon, namar ba u dei u MLA barim ka Sohïong bad u dei u nongïalam uba la trei borbah bad noh synñiang shi kat dei eh na ka bynta ka jingmyntoi ki paidbah ka konstitwensi.
U Bah Metbah u la ong ruh ba ka UDP kum ka seng kaba donlang hapoh ka Sorkar, kan sa pynsngew ïa kiba bun ki mat ynda la ïakynduh ïa u Myntri Rangbah, u Conrad K Sangma haba ïadei bad ki mat kiba ka MDA-II ka dei ban pyntyllun kum ka Sorkar na ka bynta ka jingmyntoi ki paidbah.
