Ym pat shim rai naduh lano yn pyntreikam ïa ka Roster System: High Court

Shillong, Ïaïong 03:

Ka Meghalaya High Court ha ka Lah Sngi U Blei ka la pynpaw ba kam don kano-kano ka rai ban pyni naduh lano yn pyntreikam ïa ka ‘Roster System’ ha kaba ïadei bad ka thung kam thung jam katkum ka Reservation Policy jong ka sorkar jylla.

Kane ka jingpyni na ka High Court ka la wan ha ka por ba ka la kyntait ïa kawei ka Mukotduma lane ka Public Interest Litigation (PIL) ba la ai da u Greneth M Sangma pyrshah ïa ka sorkar jylla ha kaba ïadei bad ka ‘Roster System’.

Ha kajuh ka por, ka ïingbishar ka la pynpaw ba ka lah ba ieh ha ka Ïingdorbar Thawaiñ lane ka Assembly bad ha ka sorkar ban rai naduh lano yn pyntreikam ïa ka ‘Roster System’ ha kaba ïadei bad ka jingthung kam thung jam katkum ka Reservation Policy ka jylla.

Ka Court ka la pynpaw ba ha u snem 2022, katba ka dang shong bishar halor kawei ka mukotduma, la jia ryngkhat ba ka la lap ba watla la pyntreikam ïa ka Reservation Policy ha Meghalaya naduh u Kyllalyngkot jong u snem 1972, hynrei kam shym la don pat ka Roster.

Namarkata, ka Court ka la shimkhia halor kane ka jingbym don ka Roster System bad la hap ban pynsangeh lut ïa ka jingthung kam thung jam tat haduh ban da lah ban pynkhreh ïa ka Roster System. 

Hadien kata, ka sorkar ka la pynkhreh ïa ka Roster, bad kane ka mat ka la kynjah noh.

Hynrei ka court ka la ong ba kam shym la paw ba ka la don kano-kano ka rai ba la shim naduh lano yn pyntreikam ïa ka ‘Roster System’. 

Ka ïingbishar ka la ong ba kan bha ba lada ïa kiba kum kine ki mat yn ieh ha ka Ïingdorbar Thawaiñ bad ka sorkar bad hadien ba kine ki la shim ïa ka rai, kino-kino ki nongshong shnong kiba sngew shah ktah na kata ka rai, ki lah ban wan shakhmat ban buh jingkylli katkum ki kyndon aiñ.

Ïa mynta, ka ïingbishar kam shym la kwah ban ong eiei halor kane ka mat namar kam pat shym la don kano-kano ka rai naduh lano yn pyntreikam ïa ka ‘Roster System’ bad nalor ba ka Ïingdorbar Thawaiñ ka dang shu dep ban ïatai bad ïathir halor kane ka mat. 

Namarkata, ka High Court ka la kyntait ïa kane ka mukotduma. Hynrei ka ïingbishar ka la pynpaw ba ka lah ban sa peit halor kane ka mat kham hadien.