Shillong, Ïaïong 04:
U Bah Paul Lyngdoh uba dei u Myntri ka tnat ki Kam Jngohkai Pyrthei, ha ka Sngi Ba-ar u la hiar ban jurip ïa ka thaiñ Khyndai Lad (Police Bazaar) ban khmih ïa ka jingeh bad ruh ban pynlong noh ïa kane ka jaka tang kum ka lynti ïaid kjat ki paidbah, ym ban shah ïaid shuh ïa ki kali.
Ha kane ka jinghiar jurip u Myntri, la wan ruh ban synran lang da ki heh pulit ka East Khasi Hills ha ryngkat ka jingïadon lang u DC bad kiwei ki ophisar.
Ka jingthmu jong kane ka jingjurip ka long ban pyntikna noh ban ym shah shuh ban ïaid ki kali na kane ka surok hapoh ka ïew Khyndai Lad kaba mih shaduh Umsohsun.
Haba kren sha ki lad pathai khubor hadien ba la dep ban jurip, u Bah Paul u la ong, ba kane ka jingwan jurip jong u, ka dei kaba u la leh hadien ba u la dep ban lum ïa ka jingïalang bad ki heh ophisar sorkar na ki tnat sorkar bapher bapher kynthup na ka tnat pulit.
“Ngi kwah ban pyntikna ba kane ka bynta jong ka sor kan long thik tang na ka bynta ki nongïaid kjat namar ka sor baroh kawei kala dap sa tang da ki kali bad kam don shuh ïa ki jaka na ka bynta ki paidbah ba kin ïaid. Ban pynurlong ïa katei ka jingthmu yn donkam ban ïatreilang da baroh ki tnat sorkar namar ki jingeh kiban mih kin bun hynrei ngin ym peit tang ïa ki jingeh hynrei ngin peit ruh kumno ban jop ïa kitei ki jingeh,” la ong u Bah Paul.
U la ong, ka jingangnud jong ka sorkar ka long ban pytnthikna ba ka Jylla kan don ïa ki jaka ba la buh thik tang na ka bynta ki briew ba kin ïoh ban ïaid kjat.
Haba kylli ba kumno yn leh pat ïa kito kiba shong ba sah ha Khyndai Lad, u Bah Paul u la ong, “Ki don bun kiei kiei kiba lah ban leh, hynrei ka mat ka long kumne, ka wan shwa ka jingmyntoi jong ka jylla kata jong u 35 lak ne kan wan shwa ka jingmyntoi jong ki 3 ngut ki briew. Kumta ngin ïa peit shwa ïa ka jingmyntoi jongno. Haba peit kyllum, kaei ka jingdonkam bad kiei ba ngi dei ban pynjynsur ïa ki kyndon yn sa pynwandur”.
