New Delhi, ïaïong:
Ha kaba ïadei bad ka jingpyntreikam kaba radbah bha, ka kynhun Special Cell jong ki pulit ka Delhi ka la ïoh ban kem ïa u runar uba shyrkhei ïa uba la tip kyrteng kum u Deepak Boxer na Mexico da ka jingïarap jong ka kynhun Federal Bureau of Investigation (FBI), la ïathuh ki pulit ha ka sngi Ba-ar.
“Ïa une u runar yn sa wan ïalam sha India ha kine ki sngi. U la long uwei napdeng ki runar ba shyrkhei jong ka Delhi-NCR, uba la phet na kane ka ri da kaba pyndonkam da ka Passport thok,” la ong u heh pulit.
Ki pulit ki la suba ba u Boxer u la phet sha Mexico ha u bnai Nohprah, jong u snem ba la lah ne u Kyllalyngkot. Kane ka jingjia ka la paw hadien ba ka kynhun ba dei khmih ka la ïoh ban khmih bniah ïa ka Passport, ha kaba ïa ka dur jong u Boxer la lap ba u la buh da kiba bun ki kyrteng.
Une u nongbat ïa ka Passport thok, kata u Boxer u la shim da ka liengsuiñ na Kolkata, la ïathuh ki pulit.
Ïa ka Passport thok la buh da ka kyrteng kum u Ravi Antil na Moradabad bad ha ka 29 tarik, Kyllalyngkot, u la shong da ka liengsuiñ na Kolkata sha Mexico.
U Boxer u la shah thwet halor ka jingjia kaba la jia ïa u nongshna ïing bad kiwei pat ki jingtei ïa uba la tip kyrteng kum u Amit Gupta na ka thaiñ Civil Lines kaba don ha Delhi.
Ha u Nailur jong u snem 2022, ha ka jingïakren ha ka Facebook, u Boxer u la kam ba u la donkti ban pynïap ïa u Gupta.
Ha basdang jong u bnai Nailar jong u snem 2022, u Gupta u la shah siat da bun sien ha ki runar ki bym shym la lah ban ithuh ha ka thaiñ Burari jong ka Delhi bad hadien kane u la khlad noh ha ka por ba un shah sumar.
U Boxer, uba long u dkhot u bym da paw paidbah jong ka kynhun runar u Gogi, u la phet rieh naduh katei ka por.
Ha ka por ba la pynlong ïa ka jingtohkit halor ka jingshah pynïap jong u Gupta, ki pulit ka Delhi ki la ong ba ha ka por ba la pynlong ïa ka jingtohkit kaba hashwa ha kaba ïadei bad ka jingjia jong ka jingdawa pisa bad pynïap briew uwei briew uba la shah kynnoh u la shahkem.
U Deepak Boxer, uba la pynïaid ïa ka kynhun runar, u la pynshisha ha ka Facebook ba u la pynïap ïa u nongshna ïing bad kiwei pat ki jingtei ha Delhi bad ong ba kane ka jingpynïap kam dei halor ka jingdawa pisa hynrei halor ka jingshim kput.
Shuh shuh ha ka jingbuh jingpynbna jong u ha ka Facebook, u Boxer u la ong ba u Gupta u la ïatreilang bad ka kynhun runar kaba don jingïabuh shun bad ka kynhun u Gogi ba la tip kum ka Tillu Tajpuria bad ha ka jingshisha u la long u nongbat pisa jong katei ka kynhun.
U la shah pynïap halor ka jingdon bynta jong u bad katei ka kynhun runar, la pynshisha u Boxer ha ka Facebook. Shuh shuh ka jingthoh jong u ka la ïathuh ba uwei na ki snar nongïalam jong ka kynhun runar u Gogi, u dei u Kuldeep ba la tip ruh da ka kyrteng kum u Fazza, une u la shah pynïap ha ka jingïasiat kaba markylliang bad ki pulit jong ka kynhun Special Cell, bad kane ka la long na ka jingïathuh jong u Gupta shano ba u don.
Katkum ka jingïathuh ka kaiphot la ong ba u Deepak Boxer u la ïalam ïa ka kynhun runar u Gogi hadien ka jingshah pynïap jong u Jitendra Gogi uba long u heh nongïalam jong ka kynhun ha Rohini Court.
U Boxer, u la long u nongshong shnong jong ka Gannaur, bad ka la don ka jingtyrwa buskit ha ka khlieh jong u kaba T. 3 lak sha kino kino ki briew kiba ïarap ha ka ban ïohkem ïa u ne ai jingtip kaba bniah shaphang jong u.
