Shillong, Ïaïong 04 (UNI):
Ka Bharatiya Janata Party (BJP) ha ka Sngi Ba-Ar ka la kam ba ka jingshah kynnoh ba ka dei ka seng kaba isih bad ïaleh pyrshah Khristan ka la ktah ïa ka ha ka ilekshon MLA kaba dang shu dep shen haduh ba ka la jop tang arngut ki MLA.
Ki nongïalam bahalor jong kane ka seng kynthup ïa u National Secretary, u Rituraj Sinha, ki la shong jingïalang ha ka Lah Sngi U Blei ban ïakren halor ki daw jong ka jingleh sniew jong ka BJP ha kane ka ilekshon.
Lah ban kdew ba ha kane ka ilekshon kaba dang shu dep, ka BJP ka la pynïakhun ïa ki kyrtong na baroh 60 tylli ki konstitwensi, hynrei ka la lah ban jop biang tang ha Pynthorumkhrah bad South Shillong konstitwensi.
Ym tang katta, ka jingïoh ‘vote’ jong ka BJP ha kane ka ilekshon ka la hiar khyndiat haba ïanujor bad u snem 2018. San snem mynshwa, ka BJP ka la ïoh 9.63 per cent ki ‘vote’ katba ha u snem 2023, ka la ïoh 9.33 per cent watla ha u snem 2018 ka la ïakhun tang na ki 47 tylli ki konstitwensi.
“Kawei na ki daw ba ka seng ka khlem lah ban leh bha ka long ka jingshah kynnoh ha kiwei pat ki seng saiñpyrthei ba ka BJP ka dei kaba ish bad ba ïaleh pyrshah ïa ki Khristan,” la ong u President rangbah ka BJP ha Meghalaya, u Bah Ernest Mawrie.
“Kiba kum kine ki jingkynnoh ki la kiew bha hashwa ka ilekshon lyngba ki rynsan ‘Social Media’, bad ki la ktah jur ïa ka BJP,” la ong u Bah Mawrie uba la shah rem na West Shillong konstitwensi.
Na ka liang ka BJP ka la pyrshang kat lah kat ïai ban kyntait ïa kitei ki jingkynnoh da kaba wanrah ïa ki nongïalam kiba pawkhmat naduh u Myntri Rangbahduh, u Narendra Modi, u Myntri Korbar Ri, u Amit Shah bad kiwei, hynrei ka seng ka khlem lah satia ban thaw pyrthei.
“Na ka por sha ka por, ki nongïalam bahalor jong ka seng, ki Myntri Sorkar ki la ïakynduh ïa ki nongïalam niam ban pyrshang ban weng ïa ka jingpynsngewthuh bakla ba ka BJP ka dei ka seng kaba ish bad kaba ïaleh pyrshah Khristan,” la bynrap u Bah Mawrie.
Shuh shuh ha kane ka ilekshon kaba dang shu dep, ka BJP ka la pynlong kumba 59 tylli ki jingïalang heh ha kaba la wan ai jingkren da u Modi, Shah bad kiwei ha kylleng ka jylla.
“U Myntri Rangbahduh u la kmen shikatdei ban ïohi ïa ka jingwan jong kiba bun ngut ki briew sha ki jingïalang jong u. Hynrei ngi khlem lah pat ban pynkylla ïa kine sha ka ‘vote’ bad ki paidbah ki khlem pynjop bun ïa ngi,” u la ong.
Nalorkata, u Bah Mawrie u la ong ba ka jingbym don ka jingïadei ka BJP bad ki paidbah ha ki konstitwensi ka la ktah ïa ka seng. U la ong ba ka daw jong kane ka dei namar ka jingwan ka khlam COVID-19 bad namarkata, kiwei pat ki seng ki la ïoh ban kam ei ïa ki skhim jong ka Sorkar Pdeng.
“Nga la shimti kum u President ha u snem 2020, bad nga la ïoh por tang shi bnai hashwa ban wan ka jingkhang dam. Kane ka dei ka daw ba ka seng ka khlem lah ban pynïasoh ne pynïadei bad ki paidbah ha ki shnong ki thaw,” u la ong.
U President ka BJP u la ong ruh ba ka BJP ka dang ïeng beit ha kajuh ka nongrim ban pyrshah ïa ki kam bamsap bamngem watla ka ïatreilang bad kiwei ki seng ha ka sorkar MDA 2.0.
“Ngi la leit ban ai jingkyrshan ïa ka sorkar namar ngi kwah ïa ka sorkar kaba skhem. Ngim kwah ban ïohi ba ki paidbah ka jylla kin jynjar,” u la ong.
