Shillong, Ïaïong 04:
Ka Khasi Students’ Union (KSU) ka la kren shai ba kan ym pdiang satia ban ïakren ïa ka mat halor ka lynti rel kat bym pat pyntreikam ïa ka Inner Liner Permit (ILP) hapoh ka Jylla.
“Ka nongrim kaba ka seng ka ïeng ka long ba pyntreikam shuwa ïa ka ILP, ngin sa ïakren sa ïatai la ngi pdiang ne ym pdiang ïa ka lynti rel,” la ong u President ka KSU, samla Lambokstarwell Marngar haba kren sha ki lad pathai khubor hadien ka General Executive Council (GEC) jong ka seng kaba la long ha ka Sngi Ba-ar.
U la buh jingkylli ba kumno yn ïakren halor ka lynti rel wat tang ïa ka rai kaba la mynjur halor ka ILP ruh ym pat pyntreikam.
“Da lei-lei ruh ka KSU kan ym pdiang ïa ka lynti rel…khylliap shuwa ïa ka lynnong jong ka lynti rel, ngin ïakren shuwa ïa ka lynnong jong ka ILP,” la ong u samla Marngar.
Haba kylli la ka seng kan ïakynduh ne em ïa ka Sorkar thymmai halor ka ILP, utei u nongïalam u la ong ba ka seng kan ym shongthait bad kan ïai bteng bad pyndonkam ïa ki buit, ki lad, ki lynti halor ka ILP namar kane ka dei ka mat kaba la dawa naduh u snem 1987.
“Kane kam dei shuh kaba dang thymmai. Wat la ha u snem 2019 ka ïingdorbar thawaiñ ka la mynjur ïa ka rai halor ka ILP, ka CEC kan sa shong pyrkhat ban buddien biang ïa kane ka kam ym tang na ka Sorkar Jylla, hynrei na Sorkar Pdeng kumjuh,” u la ong.
Halor ka GEC, u President u la ïathuh ba ka jingïalang ka la ïoh ban sngap ïa ki jingpynsngew jong ki shnat treikam (unit) halor ki jingeh bapher-bapher kumjuh ïa ki jingai jingmut ïa ki mat kiba dang sahteng haduh mynta.
“Kaba nyngkong kaba ngi la ïoh ban ïatai sani bha ka long halor ka jingsahkut ka mat kum ka ILP, Ktien Khasi ha kaba bun ki dkhot ki la ai la ki jong ki jong ki jingai jingmut ïa kaba ka CEC kan sa shong pyrkhat ha kine ki sngi ban buddien ïa kitei ki kam,” u la ong.
Shuh shuh u la bynrap ba ki shnat treikam ki la pynsngew halor ki kam ba ïadei bad u pud u sam bad ong ba ka seng kam shongthait kumba ka la buddien baroh shi katta khamtam haba ïadei bad ka jingbym hun ki paidbah ïa ka jingpynbeit pud ha ka kylla banyngkong.
“Hadien ba mih ki jingbym hun na ki paid nongshong shnong, ka CEC ka la ïoh ban ai jingmut ïa ka Sorkar barim ïa kaei kaba dei ban leh. Hynrei mynta ka don ka Sorkar bathymmai bad ngin ïai buddien ïa kane ban pynkynmaw ïa ka Sorkar halor ki mat barim la ka long ka ILP, Ktien Khasi, kam khappud, Them Metor, pule-puthi bad kiwei-kiwei,” u la ong.
Na ka liang jong u, u ong ba ka GEC ka la shim ïa ka rai ban pynlong ïa ka ilekshon jong ka seng ha ka 6 tarik u Jymmang mynta u snem.
Ha kane ka sngi la ïoh ban pyllait ruh ïa ka jingrwai ‘Music Video’ na ka kynhun tem ‘Dymbur’ ba la rwai lang da u Bah Desmond Rimaki Sunn halor u Syiem Tirot Sing.
