Shillong, Ïaïong 04:
U Chief Executive Member ka Khasi Hills Autonomous District Council (KHADC), u Bah Titosstarwell Chyne, u la ong ba wat lada u rem ha kane ka ilekshon MLA kaba dang shu dep, hynrei u kitbok kitrwiang ba ka jingangnud ki paidbah ka Sohra ban pynkhie im biang ïa ka karkhana pynmih dewbilat ka Mawmluh Cherra Cement Limited (MCCL) bad jingangnud ban kyntiew kyrdan District ïa ka Sohra Civil Sub-Division kin urlong noh hapoh ka jingïalam ka Sorkar MDA-II.
Une u MDC ka Sohra u la ong ba ki paidbah ki la angnud ba kane ka karkhana kan urlong bad u kyrmen ba lyngba ka jingshimkhia ka Sorkar MDA-II ha kane ka samoi treikam kaba mynta.
Ka karkhana shna dewbilat MCCL ka la khyllem hadien ba ka Sorkar Jylla kam lah shuh ban bei pisa naduh ki snem kiba la leit namar ka bun tang ka jingpynlut khlem lah treikam.
Ka Sorkar ka la rai ban pynkhie im biang ïa ka MCCL lyngba ka rukom treikam kaba donbynta lang lane joint venture hapdeng ka Sorkar bad kano kano ka kompani kaba ïahap ban donbynta lang ha ka rukom pyntreikam.
U Bah Titos uba la rem tang da 15 vote ha ka ilekshon MLA kaba dang shu dep na Sohra ha u Bah Gavin M Mylliem, u la ong ba ka dei ka rai jong ki paidbah haba ki jied ïa ki nongmihkhmat bad kum uba la ju don bad ki paidbah ka Sohra konstitwensi la 15 snem, un ïai bteng ïa ka jingshakri jong u kumba ju long baroh shi katta.
Halor kiwei pat ki mat ïakren kum ka jingbym biang ki jaka pule bad ki jaka sumar kiba u la ju rah ban kren ha ki rynsan ïalap ilekshon, une u MDC ka Sohra u la ong ba ïa ka jingbud dien un leh, hynrei ka shong ha u MLA uba la shahjied namar u don ha ka Sorkar.
