Shillong, Ïaïong 04:
U Bah Adelbert Nongrum uba dei u nongmihkhmat ka North Shillong, u la ong ba ka jingïoh vote ka jong u na ki briew kiba shong ba sah ha Them Ïew Mawlong ka pyni shai ba ki dang don ki briew kiba ïohi ïa ka nongrim kaba u ïeng na ka bynta ka jingmyntoi jong baroh.
Haba kren sha ki katto katne ki lad pathai khubor, u Bah Adelbert u la ong ba ha ka por ilekshon na ka liang ka jong u, u la dep kren shai ba un nym leit khroh ne leit nguh leit dem ban pan jingkyrshan na ki briew kiba shong ba sah ha Them Ïew Mawlong ban ai ka jingkyrshan ïa u ha katei ka ilekshon kaba dang shu dep shen, hynrei ki la don hi pat ki katto katne kiba ai ka jingkyrshan ïa u ha katei ka ilekshon.
“Nga la ong da kaba shai ba ngan ym leit nguh leit dem ïa ki namar ngam kwah ban pynpoh ïalade tang na bynta ka ilekshon, hynrei namar nga ïeng ha ka nongrim ba nga dei u trai bad ki pat ki nongshong wai. Balei ngan leit nguh leit dem tang namar ka ilekshon bad dei na kane hi ka daw ba ngam shym la ïuh kjat shisha ha katei ka jaka bad lada ngi peit ha ki ilekshon ba la dep ruh, kine ki la kyntait lypa ïa nga,” la ong u Bah Adelbert.
U Bah Adelbert u la ïathuh ba kane ka jingbym leit khroh ne leit pan jingkyrshan jong u na katei ka jaka ka dei namar ba lehse kitei ki briew haba ki ai ka jingkyrshan ïa u, kin sa buh da ki kyndon ba un pyndep ïa ki katto katne tylli ki jingangnud jong ki.
“Namar nga tip skhem ba lada nga leit ban pan jingkyrshan kin buh kyndon ïa nga, kata ka long ba nga dei ban ïada ïa ki ba kin ïoh shong junom ha katei ka jaka bad ba ngan ym kren eiei shuh shaphang ka jingdawa ba la slem jong nga ba dei ban pynsted ïa ka jingpynkynriah ïa ki,” la ong u Bah Adelbert.
Shuh shuh u Bah Adelbert u la ong ba u la rung sha ka saiñ hima sima ym ban pynheh spah ïalade shimet bad u la ong ruh ba da lei lei un ym kynriah noh na ka nongim kaba u don bad ïeng tang na ka bynta ka ilekshon.
Haba kylli ba ki don haduh 13 ngut ki briew kiba shong ba sah ha Them Ïew Mawlong kiba la ai ka jingkyrshan ïa u ha kane ka ilekshon ba dang shu dep ha kaba ha u snem 2018 ruh u la ïoh tang 13 vote na katei ka jaka, u Bah Adelbert u la ong ba ki don kiba sngewthuh ïa ka nongrim jong u bad jong ka seng, kata ba ki mih ban ïakhun ïa ka ilekshon ym tang na ka bynta kaba bha hynrei ïa kaba dei.
“Nga ai khublei kyrpang ïa kito ki 13 ngut bad na ka liang ka jong nga lei, nga kwah ban kynduh markhmat bad ai khublei ïa ki ba wat hadien ba nga kren shai, hynrei ki lah kyrshan namar ki ruh lehse ki la sngewthuh ba ka dokam ban leh ïa kaba dei ym shuh tang ïa kaba bha kumba nga la kren sha u paidbah,” la ong u Bah Adelbert.
U Bah Adelbert u la ïathuh ba ki stad kheiñ jingkheiñ saiñ hima kiba ju ai jingkheiñ ba mano ban jop ha ka ilekshon, ki la buh ïa u ha ka kyrdan kaba saw ne basan bad ym ba un long u nongjop na katei ka konstitwensi, hynrei katei ka jingjop ka jong u ka dei namar ka jingdon ïa ki atiar ba khlaiñ kaba la lah ban pynshaïong ïa kiba bun.
“Ka dei ka jingshisha ba ki la kheiñ rem ïa nga, hynrei naduh ka sngi kaba nyngkong nga tip shai ba u paidbah um dei uba bieit bad ka jingjop biang jong nga ha kane ka kynti ka dei namar ki don ki atiar kiba khlaiñ tam eh jong nga, kita ki nong vote ba jar-jar,” la ong u Bah Adelbert.
