Shillong, Ïaïong 04:
U President ka United Democratic Party (UDP) East Khasi Hills District U Bah Titosstarwell Chyne, u la sngew sammut halor ka jingkynthoh u kyrtong ka NPP na Sohïong, u Bah Samlin Malngiang bad u la ong ba um poi mutdur ba u kyrtong ka NPP un dang pyrkhat khynnah ha ka kam saiñ hima sima.
U Bah Samlin u la pynphai ktien halor ka jingkren u Bah Titos uba la kren dang shen ba lada jop ka UDP na Sohïong ha kane ka ilekshon, kan sa don ka jingkylla.
U Bah Samlin u la buh jingkylli ruh ïa u Bah Titos, katno ngut ki MLA ka UDP ka don ba ka lah ban pynkylla ïa ka Sorkar lada jop u kyrtong ka UDP na Sohïong, u Bah Synshar Lyngdoh.
U Bah Titos, uba dei u Chief Executive Member (CEM) ka Khasi Hills Autonomous District Council (KHADC), u la ong ba u khlem mutdur ba u kyrtong ka NPP na Sohïong u Bah Samlin Malngiang ba un dang pyrkhat khynnah ha ka kam saiñ hima sima.
“Ha ka jingkren jong nga, nga la ong ba lada ka UDP ka jop na Sohïong ha kane ka ilekshon kan sa don ka jingkylla namarba ka seng kan sa nang khlaiñ ym ba nga ong ban pynkylla ïa ka Sorkar namar ma nga hi ngam dei u MLA” la ong u Bah Titos.
Kumta u la ong ba kane ka jingkynnoh u Bah Samlin ka pyni ba um pat long rangbah ha ka saiñ hima namarba ha ka jingkren jong u ha Sohïong kam don kata kaba u ong ban pynkylla ïa ka Sorkar lada jop u kyrtong ka UDP.
U Bah Titos u la bynrap da kaba ong ba lada jop u Bah Synshar, kin don shibun ki jingkylla ha ka seng, naduh ka jingkhlaiñ ka seng, bad kan ai mynsiem shuh shuh ïa ki 11 ngut ki MLA ka UDP.
“Ki jingkren jong nga ki don shibun ki jingmut, bad u Bah Samlin um dei ban sngewthuh bakla ïa ka jingkren jong nga,” u la ong.
Halor ka jingong u Bah Samlin ba lah ban don ba shah bret hadien ka ilekshon MLA ha Sohïong, u Bah Titos u la ong ba ka shong ha u Bah Samlin ïano un bret, bad ka shong ruh ha ki MLA ban pynkylla ïa ka Sorkar.
