Shillong, Ïaïong 04:
U Myntri ka tnat ri dohkha ka Sorkar Jylla, u Bah A.L Hek u la leit ban khmih bniah ïa ka jinglong jingman ka jaka ri dohkha ka Fish Dale Farm kaba don ha kane ka nongbah Shillong kaba dei ruh ka jaka ban tei ïa ka Aquatic Knowledge and Incubation Centre ka ban long ka jaka pule bniah shaphang ki dohkha.
U Bah Hek u la leit peit ïa kane ka jaka lem bad ki ophisar ka tnat ri dohkha ha ka sngi Ba-ar.
Ka jingheh jong ka jaka ri dohkha ha Fish Dale ka long kumba 4.7 akar. Ha kane ka jaka, ki don bun tylli ki pung dohkha ban pynheh pynsan ïa ki dohkha bad sam symbai dohkha sha ki nongrep.
Ha kane ka jingleit jurip, u Bah Hek u la leit peit ruh ïa ki tyllong um kiba tuid sha kane ka jaka ri dohkha, bad ka jingdonkam ban pynneh pynsah ïa ki tyllong um.
Hadien ba la dep jurip, u Bah Hek u la ïathuh ba u la wan peit khnang sha Fish Dale Farm ban peit ïa ki jingdonkam jong kane ka jaka khamtam eh ban pynurlong ïa ka jingtei ïa ka Aquatic knowledge and Incubation Centre ka ban long kum ka jaka wad bniah ïa kiba pule bad kan long ruh ka jaka kaba khring ïa ki briew kiba wan kai.
U Bah Hek u la ong ba ha ka taïew ban wan, un sa leit rah ïa ka jingtyrwa sha ka Sorkar Pdeng ban ïakynduh ïa u Myntri ba peit ïa ka tnat ri dohkha haba ïadei bad ka jingdonkam ban shna ïa ka Aquatic knowledge and Incubation Centre ha Fish Dale ha ka jinglut kaba la mang antad hapoh T.50 klur.
Ha kane ka sngi, u Bah Hek u la leit peit lang ïa kawei ka jaka ri dohkha ha Cleve Colony kaba ri ïa u dohkha ‘Trout’ uba dei u dohkha ba kham pher uba im ha ka jaka kaba kham dait thah ha kaba ka jingshit jingkhriat ka dei ban long hapoh ka 18 Degree Celsius.
Ka tnat ri dohkha ha u snem ba la dep, ka la wanrah ïa ki symbai dohkha Trout na Arunachal Pradesh.
Katkum ka jingïathuh ki ophisar ka tnat ri dohkha, une u jait dohkha u dei uba kham heh dor lada die bad haduh mynta ka long kaba kham eh ïa ki nongrep ban ri ïa une u jait dohkha.
Une u dohkha u shimpor kumba 8 bnai ban heh bad ban ïoh ka jingkhia kaba long shiteng kilo.
