Shillong, Ïaïong 04:
U President ka Khasi Students’ Union (KSU), samla Lambokstarwell Marngar u la ong ba ka Sorkar ka dei ban pyntreikam ïa ka ‘Roster System’ naduh ka por ba la pynkha ïa ka bad ym ban phai dien naduh u snem 1972.
“Lada ngi kren shaphang ka mat halor ka bhah thung kam thung jam, kam dei shuh ka mat kaba dang thymmai ïa ka KSU. Naduh 2001-02 ka dei kawei na ki mat ba ngi ïakren ha kito ka por. Ngi ïohi shibun ki jingdkoh. Hooid, ngi sngewthuh ba ka long ka mat kaba ngi hap phikir bha ha bun bah ki bynta. Ki don ruh ki jyrwit-jyrwat,” la ong u samla Marngar haba kren sha ki lad pathai khubor ha ka Sngi Ba-ar.
Haba kdew ba ka jingmih ka ‘Roster System’ ka dei hadien jong ka mukotduma hapoh ïingbishar, u la pynkynmaw ba wat ha ka Dorbar Mang Tyngka ba dang shu dep, ki don ki Myntri kiba pynsngew ba ym pat lah ban pyndap ïa ki kam ba sah thylli namar ka ‘Roster System’, ha kawei ka liang kaba kdew shai ba ka Sorkar kam pat lah ban rai ïa ka lynti kaba dei ba nangno yn sdang ïa kane ka bynta.
“Hynrei ka nongrim jong ka KSU ka long ba…ynnai kyrtiang dien naduh u snem 1972, sdang nangne shakhmat ban pyntreikam. Lada ki sdang ban tih naduh 1972, ngi sngewthuh ba kan don ka jingktah kaba shyrkhei ïa ki khun samla jong ka jaidbynriew ha ka liang ka wad kam wad jam,” la ong utei u nongïalam.
U la ong ruh ba ka seng kam shym la sngap jar halor katei ka bynta, hynrei ka la ïaid shakhmat bad ki jingïakren, ki jingïasyllok bad ki ’riewsaid aiñ wat la kam pat lah ban ïathuh shai ïa ka lynti ïaid jong ka.
Haba pynsngew ba ka seng ka la shim ïa ka lynti ban leh ïa kaba bha tam, u President u la ong, “Kane kam dei ka kam shimet ne jong ka KSU ban shu ïa rai matlah…ka dei ka kam ïap kam im jong ka jaidbynriew baroh kawei. Ngi hap sngewthuh, ngim lah ban shu bam ja-khluit, hynrei ngi hap ïit ki lad ki lynti kiba kumno ban ai jingmut ïa ka Sorkar.”
U samla Marngar u la ong ruh ba seng ka la dep pynsngew sha ki nongmihkhmat ka Jylla ba kin rai ïa kaba bha tam halor katei ka bynta.
“Lada ki rai bakla, ieh kin shim ma ki ïa ka jingkitkhlieh lada mih kano-kano ka kynrum-kynram kaba wanrah ïa ka jingbym shong suk shong shngaiñ ha ka Jylla baroh kawei,” u la ong.
Haba kylli, u la ong, “Kaei ka jingmut jong ka seng…ka long ba sdang nangne shakhmat la ka long mynta u snem ne naduh ba kha ïa ka ‘Roster System’, hynrei lada ka Sorkar ka ong ba kan leit khyllie biang nangthie, nga sngew ba ka don kaei-kaei sha lyndet. Ka jingtieng bad jingdukha mynsiem ka long ba kan ktah pat ïa ki khun samla ka jaidbynriew hynñiewtrep kiba sdang ban wad kam wad jam. Ka Sorkar ka dei ban sngewthuh ïa kata.”
Shuh shuh u la bynrap, “Lada ka Sorkar ka kwah ban mareh shakhmat, ai kan shim ïa kaba bha tam, hynrei lada ka ïaleh ban mareh shadien, ngi ruh ngin hap ban ïa mareh lang lada long da kano-kano ka lynti.”
Ka Meghalaya High Court ha ka Lah Sngi U Blei ka la pynpaw ba kam don kano kano ka rai ban pyni naduh lano yn pyntreikam ïa ka ‘Roster System’ ha kaba ïadei bad ka thung kam thung jam katkum ka Reservation Policy jong ka sorkar jylla.
Ha kajuh ka por, ka ïingbishar ka la pynpaw ba ka lah ba ieh ha ka Ïingdorbar Thawaiñ lane ka Assembly bad ha ka Sorkar ban rai naduh lano yn pyntreikam ïa ka ‘Roster System’ ha kaba ïadei bad ka jingthung kam thung jam katkum ka ‘Reservation Policy’ ka Jylla.
