Shillong, Ïaïong 05:
U Bah Adelbert Nongrum uba dei u MLA ka Voice of the People’s Party (VPP) na North Shillong Constituency, u la ong ba kum ka sorkar synroplang ka dei ban don ïa kata ka Common Minimum Programme (CMP) kaba kum ka sorkar synrop ki ju ïamynjur ban pyntreikam bad ka long ka thup jong ki mat treikam ba kongsan jong ki seng kiba don ha ka sorkar. Kine ki mat ki dei kiba ki seng saiñ pyrthei ki la pynpaw paidbah ha ka por ïalap ilekshon.
Haba kren sha ki katto katne ngut ki lad pathai khubor, u Bah Adelbert u la ong ba kum uwei na ki nongmihkhmat bad kum ka seng kaba khlem don bynta lang bad ka sorkar Meghalaya Democratic Alliance (MDA 2.0) hashwa ban thaw ïa ka sorkar synroplang ka dei ban don ïa ka Common Minimum Programme bad kam dei ban don hadien da la ïaid ka jingthaw ïa ka sorkar ban sdang ïakren, hynrei ka dei ban don naduh ka sngi kaba nyngkong ba la thaw ïa ka sorkar.
U Bah Adelbert u la ong ba ka jingkren jong ka seng United Democratic Party (UDP) halor ka Common Minimum Programme ka long kumba ki dang shu sngewthuh mynta da la dep ban thaw ïa ka sorkar.
“Ka dei naduh ka sngi kaba sdang hi, ka dei ban don kata, hynrei kumba nga ïohi na ka liang ka UDP ka kren shaphang ka Common Minimum Programme, i kumba ki dang shu sngewthuh da la dep ban thaw ïa ka sorkar,” la ong u Bah Adelbert.
U la ong ba um da don eiei ban kren halor kane, hynrei un ïeh ïa kata ha ka jingstad ka jong ki paidbah ba kin bishar namar yn nym lah ban ïaleh khun jingïalehkai namar ka politik hi ka dei ban rai ban wanrah ïa ka jingkylla hapoh ka jylla bad ban don ka jingshngaiñ na ka bynta ki trai ri trai muluk.
Kum ban shu pynkynmaw ha ka sorkar kaba rim kata ka sorkar Meghalaya Democratic Alliance (MDA) ruh ka khlem don satia ka Common Minimum Programme bad ha kane ka sorkar kaba mynta ruh ka Meghalaya Democratic Alliance (MDA 2.0) ka khlem don satia naduh ba la thaw ïa ka.
