Shillong, Ïaïong 04:
U Myntri ba khmih ïa ka tnat Excise ka Jylla u Bah Kyrmen Shylla ha ka sngi Balang u la ong ba ka tnat Excise kumba ka long mynta, ka dei ka tnat kaba pynmih ka jingïohnong bad ka dei ruh kawei na ki tnat kaba pynmih bun ka khajna na ka bynta ka jylla.
Haba kren sha ki lad pathai khubor u Bah Kyrmen u la ong ruh ba ka khajna kaba pynmih da ka tnat Excise ka dei bad shong beit ha ka jinglah die jong ka kyiad bad kumta ka jinglait tuh jong ka khajna ka dei pat kawei na ki bynta kaba sngewkhia bad ktah bha.
Haba kylli hato ka sorkar ka bud thik beit katkum ki kyndon kiba la buh ha kaba ai ïa ki laisen dukan kyiad, bad lada la bud ruh ïa ka jingjngai haba ailad ïa ki trai ban plie bad pynïaid ïa ka dukan die kyiad, u Myntri u la ong ba ka sorkar ka bud thik ïa baroh ki kyndon kumba la buh da ka Ministry jong ka Sorkar Pdeng bad ruh ba la peit bniah ïa ki kot ki sla shwa ban ai laisen ïano ïano ban plie dukan kyiad.
“Ka shong ha ka jaka bad ka dong ha kaba ki Dorbar Shnong kin ai ïa ka No Objection Certificate (NOC), kumta ngim don jingeh hynrei lada dei ba ym ai pat ïa ka NOC na ka bynta kane ka kam, kumta ïa ka laisen ruh yn nym lah satia ban ai ha kano kano ka liang ruh,” u la ong.
