Srinagar, ïaïong:
Arngut ki lehnoh, kiba la shah kynnoh donkti ha ka jingjia jong ka jingkawang bom kawang kti ïa kawei ka dukan die kyiad kaba don ha Baramulla distrik kaba ha ka bynta ba shaphang Shatei jong ka Kashmir ha ka 17 tarik, Jymmang jong u snem ba la lah, ki la lait phet na kti jong ki pulit, la ïathuh u heh pulit hynnin ka sngi.
U heh pulit u la ong ba kine ki arngut kiba dei ki lehnoh jong ka kynhun LeT ïa kiba la tip kyrteng kum u Maroof Nazir bad u Shahid Showkat, kiba la shahkem ha ka 17 tarik, Jymmang jong u snem ba la lah, ki la phet na ka jaka treikam jong ki pulit ka Baramulla hynnin ka step.
U la ong ba hadien ka jingjia, ka kynhun shipai ïada ri ka la pynlong ïa ka jingleit thwet kaba jur ïa ki. U heh pulit u la ong ba kine ki lehnoh ki la shah set ha ka jaka treikam jong ki pulit ka Baramulla bad ki la lait phet ha ka por ba don ka Sehri (ka jingbam step kaba ju bam ki Muslim hashwa ban mih ka sngi ha ka por ba don ka Ramadan). “Ka la don ka jingbuh jingmudui ha kaba ïadei bad ka jingjia bad ka jingtrei shitom ka dang bteng na ka bynta ban ïohkem ïa ki,” u la ong.
