Shillong, Ïaïong 05:
U Myntri ka tnat bording ka Sorkar Jylla, u A.T. Mondal, u la ong ba ka jinglong jingman jong ka suiñbneng bad ka jingbym biang ka um ha ki jaka pyllang um ban sam bording namar ka jingduna palat u slap, ka la pynlong ban shim ïa ka sienjam ban pynlip ding ilektrik kaba khah-khah hapoh ka jylla.
Ïa kane, u Mondal u la ïathuh haba kren sha ki lad pathai khubor mynta ka sngi balang, haba buh jingkylli halor ka jingpynlip ding ilektrik ha baroh kawei ka jylla.
U Mondal u la ong ba ka jingduna ka jinghap slap ka la ktah ïa ki projek pynmih bording kiba shaniah ha u slap ban kham heh ka um.
U la ong ruh ba ka jingbym treikam ki projek pynmih bording ha kiwei ki Jylla ki don, kum ka Khandong bad Kupli Hydro Electric Project. Hynrei kine ruh ki ki duna um ban pynmih ilektrik bad dei na kane ka daw ba ka Jylla ka duh ban pynmih ding ilektrik kham bun.
Haba kylli ïa ki sienjam kiba ka Sorkar Jylla ka shim na ka bynta ban pynduna ïa ka jingkyrduh ding ilektrik, une u Myntri ka tnat bording u la ong ba ka Sorkar Jylla ha ki snem ba mynshwa, ka la dep ïasoi soskular bad ki kompani kiba dei ban tei ïa ki projek pynmih bording, hynrei na kiba bun ki daw, kine ki kompani kim shym la lah ban pynïaid shakhmat ïa ka jingtei ïa ki projek, bad ka kam ka la sahkut noh kumto.
Haba kylli shaphang ka jingsahram ka MeECL sha kiwei ki kompani kiba ka Jylla ka shim ïa ka ding ilektrik, na ka liang u Mondal u la ong ba kane ka kam ka dei kaba ïai bteng, bad kam don jingktah namarba ka sorkar ruh ka don kum ka nongbahkhlieh bad ai jingkyrshan ïa ka MeECL haduh mynta.
Haba kren pat halor ka jingkynnoh pyndonkam bakla ïa ka Saubhagya Scheme, u Mondal u la ong ba ka dei tang ka jingkynnoh bad ka jingtohkit ka la don ha kaba la phah ïa ka kaiphod sha ka tnat pla tyngka na ka bynta ban khmih ïa kane.
U la ong ba ka Jylla ruh ka don la ki jong ki jingeh namar ki don ki projek kiba la maramot thymmai kiba khlem lah ban pynmih bording.
Ka jingkyrduh bording ka Jylla ka long ba ka Jylla nalade tang 16 million unit bad ka bording ba ïoh na kiwei kum na ka Sorkar Pdeng ka long 72 million unit.
U la ong ba mynta ka jingdonkam bording ka la nang kiew sha ka 200 million unit, katba ka jingduna pat ka long 112 million unit.
Une u Myntri u la ong ba ka jingbym treikam ki projek ka la ktah lang ïa ka Meghalaya namar kum ka Kupli stage-I 200 MW kaba ka Jylla ka ïoh bhah kumba 35MW, ka Khandong power station kaba 50 MW ha kaba ka Jylla ka ïohbhah 8.51MW bad ka Kupli stage-II kaba 25 MW kaba ka Jylla ka ïohbhah 3.45 MW.
U la ong ruh ba ka Myntdu Leshka hydel power project, ki 2 tylli ki unit jong ka kim treikam bad ka Umïam kaba don 2 unit ruh ka mad jingeh namar ka jingthut kaba hap ban maramot man u snem.
Kumta u la ong ba ki paidbah ki mad jingeh bad ka Sorkar ruh ka mad jingeh kaba hap ban shim ïa ka sienjam ban pynlip bording teng katto katne por.
Namarkata, u la kyntu ïa ki paidbah ban ïashah lang bad ka Sorkar namar kane ka jingeh ka dei ka bym lah lait.
