Shillong, Ïaïong 05:
Ka jingsiang rong ïa ki surok ha kiba bun ki bynta jong ka nongbah Shillong ka la ïaid shaid-shaid shakhmat kum shi bynta ban pynbhabriew ïa ki surok syngkien na ka bynta ban pdiang ïa ka jingïalang kaba heh ka ban sa long ha une u bnai ba mynta.
Haba phai sha ka jingpyntrei ïa ka jingsiang rong ne syrdep ïa ki thliew ki syar ban pynjlih ïa ka surok, la ïohi ba ka la long kaba la pynhun ïa ki nongleit nongwan, namar ha kiba bun ki bynta la lah ban pyndep bad ruh ban pynsuk ïa ka leit ka wan.
Hynrei katkum ka dur-khih (video) kaba la saphriang ha ki rynsan ‘social media’ la lap ba ka la don ka jingleh torti ha kaba ïadei bad ka jingsiang rong ha ka surok ha Mawlai Mawroh, kata ka surok najan ka skul Meghalaya Police Public School. La ïohi ba ïa kane ka surok kaba dang shu dep siang thymmai mynta dang katto katne por eiei ka la sdang jot, hynrei ym tang katta, ïa kane ka surok lah ruh ban khlong ne pied tang da ka kti.
Katkum kane ka dur-khih ba la saphriang la ïohi ba uwei na ki ’riew paidbah u la ring dur artad ha ka por ba u dang khlong tang da ka kti ïa ka rong kaba la siang khlem da pynmih bor satia.
Haba kumne ka ïaid ka jingtrei, ïano yn kynnoh. Hato ka dei ka jingpyntrei torti jong u kontraktor ne ka dei ka jingleh sting bad bym shimkhia jong ka tnat PWD (Roads).
Kumta haba ka paw kumne, hato yn shu pynlut phut kai ïa ka pisa paidbah kumto, naba la sngewthuh ba lada ka long ha kato ka dur, imat kiba bun ki bynta ba la dep ban siang rong thymmai, ki lah ban jot noh tang hadien katto katne por.
