Hyderabad, ïaïong:
U Bandi Sanjay Kumar, uba long u heh nongïalam jong ka seng BJP ha Telangana, u la shahkem ha ka ïingsah jong u kaba don ha Karimnagar hadien ka shiteng synñia ha ka sngi Balang, kane ka jingshahkem jong u ka la long khyndiat sngi shwa ka jingleit jngoh jong u Myntri Rangbahduh u Narendra Modi ïa ka jylla.
Ïa ka ïingsah jong u MP la leit khynra da ki kynhun wadbniah, bad u la shah ïalam noh sha patok.
Kine ki jinglong jingman ki la jia, haba ki nongsngewlem bad ki dkhot jong ka seng jong u Bandi Sanjay ki la pyrshang ban thom da ka bor pyrshah ïa ki pulit. Kumba la ïathuh ka tyllong khubor, la ong ba na ka jingkhmih bniah na ki CCTV la ïohi ba u nongïalam jong ka seng BJP u la shah paring ha ki pulit bad pynbor ïa u ba un shong ha ka kali ki pulit.
Ki pulit ha Nalgonda distrik ki la shimti bad ïalam ïa u sha Bommala Ramaram Station. Ngi dang ap ïa ki jingtip kiba bniah ban sa ïathuh da ki pulit.
Katkum ka jingïathuh jong u Premender Reddy, uba long u General Secretary jong ka seng BJP ha ka jylla, u la ong, “U president jong ka seng BJP ha ka jylla u Bandi Sanjay u la shahkem ha ki pulit ha ka por shiteng synñia jong ka sngi Ba-ar bad ka sngi Balang. U la shahkem da ka lynti kaba beaiñ na ka jaka sah jong u kaba don ha Karimnagar.”
“Ki la dei la kumno kumno ban shim da ki lynti kiba ïadei bad ka aiñ ha ka step kaba bud na ka bynta ka jingpyntreikam, shano ba u Bandi Sanjay u dei ban leit? Kane kam don ei ei hynrei ka long tang kumno ban pynthut ïa ka prokram jong u Myntri Rangbahduh ka ban long ha Telangana,” la pynshisha u Reddy.
“Ka donkam haduh katno eh ban leh ei ei pyrshah ïa u dkhot jong ka Parliament ha ka por shiteng synñia? Kaei ka kam sniew ne ka mukotduma ba u la shah pynngat? Kim shym la ong ei ei ïa ngi. U la shu shah ïalam sha Bhongir. Balei ba u la shah ïalam sha katei ka jaka?” la buh jingkylli shuh shuh u Reddy.
“Ka daw kaba don sha lyndet ha kaba ïadei bad kane ka jingleh jong ki pulit, ka long ba ngi la pynsawa ïa ka sur jong ngi pyrshah ïa ka sorkar u KCR halor ka jinglait tuh ki jingkylli eksam. Kane baroh ka la long pyrshah ïa ka synshar paidbah” la ong u Reddy.
Ki nongïalam jong ka seng BJP ha Telangana ki la pynbna ban pynlong da ka jingïakhih ha ka jylla hadien ka jingshahkem jong u Bandi Sanjay.
“Ngi la thmu ban pynlong da ka jingïakhih pyrshah ha ka jylla halor ka jingleh pyrshah jong ki pulit ïa u President jong ka seng BJP ha ka jylla,” la bynrap shuh shuh u Reddy.
