New Delhi, ïaïong:
U Myntri Rangbah jong ka Rajasthan u Ashok Gehlot ha ka sngi Ba-ar u la shah pynshisha ba u la long Positive na ka jingpang Covid-19.
U nongïalam jong ka seng Congress ha ka jingphah khubor jong u lyngba ka Twitter u la pyntip shaphang ka jinglong ka koit ka khiah jong u ha kaba u la thoh ba u la shah ktah ha u khñiang jingpang Coronavirus bad don ruh ïa ki dak ki shin jong ka jingpang.
U Gehlot u la ong shuh shuh ba un sa ïai bteng ha ka ban trei napoh ka jaka sah jong u bad u la buh ka jingkyntu ïa ki paidbah ba ki dei ban long kiba husiar bad ban bud ryntih ïa ki kyndon ba la buh ha kaba ïadei bad ka Covid-19.
Ha kaba ïadei bad kane, la ïathuh ba kumba la sakhi, la ong ba ha India ha ka sngi Ba-ar la ïoh jingtip ba ki la don kumba 3038 ngut ki briew kiba la shah ktah ha ka jingpang Covid ha ki 24 kynta ha kaba baroh kiba la shah ktah ha ka jingpang haduh katei ka sngi ki la don 21,179 ngut.
Ha kaba ïadei bad ka jingsdang kiew kiba ïoh ïa ka jingpang COVID ha India, u Myntri ka sorkar kmie uba dei khmih ïa ka tnat ka koit ka khiah u Mansukh Mandaviya u la ong ba u khñiang jingpang Omicron uba don ka jingktah kaba ïasyrïem ïa kane ka jingpang ha kaba la sdang ban saphriang ha ka ri kam shym da pynbun eh ïa ki briew ba kin shah sumar ha ki jaka ai jingsumar bad ki briew kim dei ban khuslai halor kane, hynrei kaba ki dei ban leh ka long ban bud ïa ki kyndon ba la buh.
“Ngi la dei ban long kiba husiar hynrei ym donkam ban khuslai. Ka Ministry of Health and Family Welfare ka la pynmih ïa ki kyndon kiba thymmai ha kaba ïadei bad ka jingpang Covid-19 haba la don ka jingkiew jong kiba ïoh ïa ka jingpang ha ka taïew ba la lah ha kylleng ka ri.
