Nongpoh, Ïaïong 05:
Ha kawei ka jingjia kaba la wanrah ïa ka jingkulmar jingmut bad pynlyngngoh ïa kiba bun ki paidbah kiba thmu ban leit sei pisa na ka Meghalaya Rural Bank lane kata ka Bank Nongkyndong kaba ju tip paidbah ha ka thaiñ Umden, ki hap ban siew T.5 kawei ka slip sei pisa lane ka withdrawal slip haba ki thmu sei pisa.
Kane ka jingshim kabu jong ki nongtrei katei ka bank ka la paw pyrthei ha ka sngi Balang hadien ba ïoh jingujor na kiba bun ki paidbah. Haba ïadei bad kane ka jingjia, katto katne ngut ki samla jong ka thaiñ Umden ki la leit jurip ban lap hi dalade halor katei ka jingkynnoh.
Ha katei ka jingleit jong ki samla, la ong ba bun na ki paidbah kiba thmu sei pisa ki la dep ban thied ïa katei ka slip sei pisa ha ka dor kaba T.5. Nangta ki la kynnoh ruh ba kane ka dei ka jingshim kabu ki nongtrei katei ka bank, naba ha kiwei ki bank ym ju don satia kiba shim pisa kumne haba leit sei ne leit thep pisa.
Uwei na ki samla rangbah ka thaiñ uba la leit jurip ha katei ka bank, u Sylvanus Mallai haba kren sha u nongthoh khubor, u la pynpaw ïa ka jingsngewkhia jur halor katei ka jingshim kabu jong ki nongtrei ka bank bad ïathuh ruh ba ki nongtrei ka bank ha jaka ba kin ai ïa ki slip sei pisa, ki phah pynban ïa ki paidbah ban leit thied na kawei ka dukan Xerox kaba don marjan da kaba hap ban siew ha ka dor 5 tyngka.
Utei u samla u ong ruh ba ha ka jingshisha ka dei ka kamram jong ka bank ban pynbiang ïa kitei ki slip sei pisa, hynrei kaba lyngngoh ka long kumno la phah pynban ïa ki paidbah ban leit shim ïa ki slip sei pisa na ka dukan Xerox bad hap ban siew da ka dor. U kynnoh ruh ba kane ka dei tang ka jingshim kabu jong ki nongtrei ka bank naba u Branch Manager u don hapdeng ka jingshim shuti.
Na ka liang utei u samla u la buh ruh ka jingkyntu sha ki bor ba halor jong katei ka bank ba ki dei ban shimkhia halor kane ka bynta bad leh ïa kaba donkam khnang ba kum kine ki jingshim kabu ïa ki paidbah kan nym jia shuh nangne shakhmat.
