Kolkata, ïaïong:
Ka shnong Rishra kaba don ha Hooghly distrik jong ka West Bengal ka dang ïakynduh jingeh na ka daw jong ki jingmih ki jingïakynad ha ka por ba don ka jingïaid riewblei jong ka jinglehniam Ram Navami ha kaba ki la mih ki jingïakawang maw bad ki jingïakajia kumba ka la long ha ka miet jong ka lah sngi U Blei. Na kane ka jingjia ka la wanrah ki jingtieng jingsyier bad wanrah ïa ka jingkhang khyrdep jong ki jaka ïadie ïathied bad kiwei pat ki jaka treikam ha ka sngi Ba-ar.
Haduh ka janmiet jong kane ka sngi, ym pat lah ban pynshisha ïa ka jingdon jong ki briew kiba la mynsaw na ka jingïakynad ha kaba ka Myntri Rangbah jong ka jylla ka Mamata Banerjee ka la kynnoh ba kiba la wanrah ïa kane ka jingïakynad ki dei ki briew kiba nabar kiba don ka jingpyrshah ïa ka jylla jong ka.
Ha kaba ïadei bad ka jingjia ki pulit ki la ïoh ban kem ïa ki 50 ngut kiba la shah suba donkti ha ka jingïakynad, ïa ki 38 ngut la ïoh ban kem ha ka sngi Ba-ar.
Ka jaka kaba la jia nyngkong ka jingïakynad ka la long ha Gate No 4 jong ka jaka sangeh rel ha Rishra hadien ka por 10 baje, mynmiet jong ka lah sngi U Blei, ha kaba kane ka la pynlong ïa ki rel ba dei ban ïaid ha ka lynti rel ha Howrah ba kin sangeh treikam. Ki rel kiba ha kane ka thaiñ ki la sangeh ban ïaid ha ka lynti rel ha Howrah-Bandel bad ki rel kiba dei ban leit jingleit jngai kum ka Doon Express bad Kathgodam Express ki la shah pynsangeh treikam, ha kaba kane ka la pynlong ïa ki nongleit jingleit ha ka jaka sangeh rel ba kin ïalum da ki spah ngut namar ba ki ap ïa ki rel naba ki thmu ban leit jingleit.
Ha kaba ïadei bad ka jingkynthoh jong ka seng BJP halor ki jinglong jingman ha West Bengal, ka Myntri Rangbah jong ka jylla ka la ong ba kine baroh ki dei ki jingleh jong ka seng BJP.
