New Delhi, ïaïong:
Ka Delhi High Court hynnin ka sngi ka la kyntait halor ka jingkyrpad jamin jong u nongïalam jong ka seng Aam Aadmi Party (AAP) u Satyendar Jain ha kaba ïadei bad ka jingjia jong ka jingkamai spah beaiñ ba la mudui da ka kynhun Enforcement Directorate (ED).
Ka High Court, ha ka por ba ka la kyntait ïa ka jingkyrpad jamin jong u nongïalam jong ka seng Aam Aadmi Party (AAP) ka la ong, ba u lah ban leh donbor ïa ki briew bad ba un pynduh pyndam noh ïa ki sabut.
Ha ka 22 tarik, Lber, ka ïingbishar ka la buh shwa sharud ïa ka jingkyrpad jamin jong u Myntri barim jong ka Cabiniet u Jain bad arngut ki nongïarap jong u kiba kynthup ïa u Vaibhav Jain bad u Ankush Jain, kiba la shah kynnoh donkti lang ha ka jingjia.
U Jain u la shahkem ha ka kynhun Enforcement Directorate ha kaba ïadei bad ka jingjia kaba la jia ha ka 30 tarik, Jymmang jong u snem ba la lah bad shah kynnoh ba u la donkti ha ka ban kamai ïa ka spah bymhok lyngba saw tylli ki kompeni ïa kiba la shah pynshisha ba ki la ïadei kam bad u.
Kum ka jingkyntait halor ka jingpan jamin jong u riewsaiñ pyrthei jong ka seng AAP, u Justice Dinesh Kumar Sharma u la ong ba u Jain u la long u briew uba donbor bad ym lah ban ong ba un biang ha kaba ïadei bad baroh ar ki jingbuh kyndon na ka bynta ban pyllait jamin hapoh ka jingtreikam jong ka Prevention of Money Laundering Act.
U la kyntait ruh ïa ki jingkyrpad jamin ba la phah da u Vaibhav Jain bad u Ankush Jain.
“Ka jingshisha ka long ba ka kynhun CBI ka la buh da ka jingmudui jong ka Disproportionate Assets (DA). Ka ïingbishar kaba mynta kam donbor na ka bynta ban leh ei ei ha kaba ïadei bad kane ka jingpyntreikam. Kumba ka paw ka jingshisha la ong ba ka DA ka la shah buhrieh. Ka ïingbishar ka la hap ban khmih bniah ha kaba ïadei bad ki jingtohkit ba hashwa halor ka jingjia. Kumba la shem, la ong ba ki kompeni kiba don ka jingïadei bad u ki dei kiba la shah pynïaid ha u,” u la hukum.
