Hyderabad, ïaïong:
Kiba bun na ki nongïalam jong ka seng Congress ha Telangana ki la shahkem ha ki pulit ha ka sngi Saitjaiñ hashwa ka jingleit jngoh jong u Myntri Rangbahduh u Narendra Modi sha ka jylla.
U President jong ka National Students Union of India (NSUI) u Balamuri Venkat, u President jong ka Youth Congress u Shivsena Reddy, u President jong ka kynhun ki Dalit jong ka Congress u Pritam bad kiwei pat ki la shahkem. Ka jingleit jong u Myntri Rangbahduh sha Hyderabad ha katei ka sngi ka long na ka bynta ka jingleit plie bad buh ïa u mawnongrim jong ki Project kiba la kot sha ka T. 11,300 klur ha Telangana nalor ka jingpyllait paidbah ïa ka Secunderabad-Tirupati Vande Bharat Express. Ha kane ka sngi jong ka jingleit jong u Myntri Rangbah, ka la don ka jingpyrkhing ha kaba ïadei bad ka rukom ïaid jong ki kali. U mawnongrim ba u Myntri Rangbahduh u la leit plie ka dei ïa ka AIIMS Bibinagar bad san tylli ki National Highway Project.
U la leit plie ruh ïa u mawnongrim na ka bynta ban pynbha ïa ka Secunderabad Railway Station bad ïa kiwei pat ki Project kiba ïadei bad ka tnat Railways. Kane ka rel Vande Bharat kaba thymmai kan sa kham pynduna ïa ka por ban leit jingleit hapdeng ki ar tylli ki nongbah da kumba shiteng kynta bad ba kan sa ai jingmyntoi na ka bynta ki nongleit ïaid riewblei.
