Chennai, ïaïong:
U Myntri Rangbah jong ka Tamil Nadu u M.K.Stalin u la buh ka jingkular hapoh State Assembly ba ka sorkar jylla kan ym ailad ïa ka jingtih ïa ki marpoh khyndew ha ki thaiñ ba don harud jong ka wah Cauvery.
Kum ka jingai jubab halor ka jingbuh jingkylli da ki dkhot ba bun jong ki seng saiñ pyrthei, kynthup u MLA jong ka seng CML u T.R.B.Raaja, u la ong ba ha kano ka rukom ki dkhot hapoh ka ïingdorbar ki la lyngngoh haba ïohsngew ba ka sorkar kmie ka la jied ïa ki lai tylli ki Block ha Tamil Nadu na ka bynta ban buh ïa ka jaka bam die ïa ki marpoh khyndew ha ki distrik kiba don harud jong ka wah Cauvery, ma u ruh u la kyndit haba u la ïoh jingtip halor kane.
U la ong ba shen yn sa bishar bniah halor kane, u la phah da ka jingthoh sha u Myntri Rangbahduh u Narendra Modi ha kaba la buh ka jingkyrpad ïa u ba u la dei ban weng noh ïa kitei ki lai tylli ki Block ha Tamil Nadu ba la thmu ban buh bad die ïa ki marpoh khyndew.
U la ong ba u la phah ïa ki kopi sha u nongïalam jong ka seng DMK ha Parliament u T.R.Baalu bad bthah ïa u ba u la dei ban aiti ïa ka sha u Myntri ka sorkar kmie uba dei khmih bad ban buh jingthoh ha kaba ïadei bad ka jingpyrshah jong ka jylla halor kane ka jingthmu pyntreikam.
Naba u Myntri ka sorkar kmie uba dei khmih halor kane um don, u Baalu um lah ban ïakynduh ïa u markhmat, u la ong.
Ha kaba ïadei bad kane, u la ïakren bad u Myntri lyngba ka Phone bad ka shithi ka la kular ba ka sorkar kmie kan sa khmih bniah ha kaba ïadei bad katei ka jingthoh ba la phah da u Myntri Rangbah bad ong ïa u ba um dei ban don jingkhuslai halor kane.
U Stalin u la ong ba u la khmih bniah ha kaba ïadei bad kane ka mat bad ka sorkar Tamil Nadu kan ym ai jingbit ei ei na ka bynta ban tih ïa ki marpoh khyndew ha ki thaiñ ba don harud jong ka wah Cauvery jong ka jylla.
‘Nga ong ïa kane ym tang ba nga dei u Myntri Rangbah hynrei kum u briew uba dei na kane ka thaiñ na Tiruvarur distrik ha kaba ka sorkar kan ym ai jingbit na ka bynta ban tih ïa ki marpoh khyndew”, u la ong.
