Bengaluru, Ïaïong:
Hadien ka jingpynbna jong u khlur ak phlim ka Kannada u Kichcha Sudeep ba un ai ka jingkyrshan ïa u Myntri Rangbah jong ka Karnataka u Basavaraj Bommai bad ong ba un sa ïarap ha ka ban ïalap ilekshon, u KP Sripal, u nongïasaid aiñ ha Shivamogga u la phah jingthoh sha ka Election Commission, ha kaba u la bthah ba u la dei ban khang shwa ïa ki phlim bad kiwei pat ki jingpynbyrngia jong une u khlur ak phlim haduh ban da dep ban pynbna ïa ki nongjop hadien ka jingïakhun ïa ka ilekshon.
Ha ka taïew ba la lah u Sudeep u la pynbna ban don bynta ha ka ban ai jingkyrshan ïa u Bommai. U nongïasaid aiñ u la pynshisha da kaba ong ba ki phlim bad kiwei pat ki bynta ba ai jingmyntoi ïa une u khlur ak phlim la dei ban pynsangeh shwa ha ka ban pyni ha ki TV ne ki wanrah ha ki rynsan namar ka jingtreikam jong ka Model Code of Conduct.
U la thoh, “u khlur ak phlim u Sudeep u la pynbna ba un ai ka jingkyrshan ïa ka seng BJP, bad un sa ïaisah kum u nongïalap ilekshon ha kylleng ki jaka jong ka jylla. Namar kane, nga la buh ka jingkyrpad ïa ka EC ba kan khang shwa ha ka ban pyni ïa ki phlim jong u bad kiwei pat ki bynta ki ban pyni ha ki TV bad kiwei pat ki rynsan tad haduh ka 13 tarik, Jymmang, kum shi bynta ban bud ïa ki kyndon hapoh ka jingtreikam jong ka Model Code of Conduct.”
Hashwa u Kichcha Sudeep u la ïohpdiang ïa ka shithi byrngem ha kaba ïadei bad ki jingpynjah burom ïa u. Ha ka shithi u briew u bym shym la lah ban ithuh u la byrngem ban pyllait paidbah ïa ka Video barieh jong une u khlur ak phlim.
Une u khlur ak phlim u la jubab da kaba ong ba un sa ai jingsneng halor kane ha kaba biang bha ïa kiba donkti halor jong ka.
U la pynshisha da kaba ong ba ki la don kiba na ka karkhana shna phlim kiba la don bynta ban leh ïa kane.
Ha ka taïew ba la lah, u Kichcha Sudeep u la ïakren ha ka jingïalang bad ki nongthoh khubor ha ryngkat u Bommai bad pynbna ba un ai jingkyrshan ïa u ha ka ilekshon.
U Sudeep u la pynshai shuh shuh da kaba ong ba un ym ïakhun ha ka ilekshon, hynrei un shu ïarap ïa u Bommai ba un jop ha ka jingïakhun ilekshon.
“Ngam dei u riewsaiñ pyrthei hynrei u khlur ak phlim. Nga don hangne ban ai ka jingkyrshan ïa u briew uba ju ïarap ïa nga ha ki por ba nga ïakynduh jingeh. Ka la dei ka por ban pynpaw ka jingsngewnguh ïa kum kine ki briew ha ka jingim,” la ong u Sudeep.
