Gurugram, ïaïong:
Kumba la ïathuh ki heh pulit, la ong ba hadien ba ka la pynlong ïa ki 20 tylli ki jingleit khynra ba la long ha ka taïew ba la lah ha ki ïing jong kito kiba la shah suba ba ki la donkti ha ka ban khaïi tuh ïa ki masi, hynrei ym shym la lap ne ïohkem ïa ki, ka tnat pulit ka la rai ban pyndonkam noh da ki Drone ha ka ban leit wad ban thwet ïa kine ki briew kiba la donkti.
Kumba la ïathuh u Superintendent of Police jong ka Nuh u Varun Singla la ong ba la sam sha kylleng ki jaka treikam jong ki pulit bad ki kynhun ba pyrshah ïa ki kam beaiñ ïa ki kyrteng jong kito kiba la shah kynnoh donkti ha kane ka kam beaiñ.
“Ka la don ka jingleit khynra ba la pynlong ha ki shnong ba bun jong ka distrik kiba kynthup ha Multhan, Ghaghas, Kansali, Bhudbas, bad Nangal Mubarikpur da u Deputy Superintendent of Police jong ka Ferozepur Jhirka, ha ryngkat ka kynhun jong ki pulit, ha kaba la pyndonkam da ki Drone Camera. Wat lada kito ki briew kiba la shah suba kim don ha ki ïing bad ki jaka ba ki rieh, ka jingdon jong ki pulit ha katei ka thaiñ kan sa buh jingeh ïa ki,” u la ong.
Kumba la ïathuh da ki pulit, la ong ba ha kaba ïadei bad ka jingïohlum jingkheiñ ha palat 7 snem ba la leit, ki la lah ban ithuh ïa 98 tylli ki shnong, ha kaba 40 tylli na ki ki dei kiba marjan bad ka Aravallis, bad ki nongshong shnong ki la shah mudui ba ki la don bynta ha ka ban tih beaiñ ïa ki marpoh khyndew, ka jingkhaïi beaiñ ïa ki masi bad kumjuh ka jingot bad shoh doh ïa ki.
Katkum ka jingïathuh jong u Singla, ka thong ka long ban pynduna ïa kine ki kam beaiñ ha ka distrik, bad ki la pan ka jingïarap bad jingkyrshan na ki nongpynïaid shnong bad ki heh nongïalam shnong ba kin pynlong ïa ki prokram jingpynsngewthuh paidbah halor kane. “Ngin sa pynlong ïa ka jingleit khynra ha ka por bym poi pyrkhat bad lada lap ïano ïano ba donkti ha ki kam beaiñ kin sa shah pynshitom bad shah beh shnong,” u la ong.
Ha u snem ba la lah, ki la don kumba 30 tylli ki jingjia jong ka jingtih beaiñ ïa ki marpoh khyndew ïa kiba la dep ban buh jingthoh, bad kumba 7 tylli ki jingjia la buh jingthoh ha une u snem naduh ka 1 tarik, Kyllalyngkot.
Kumjuh, la ïathuh ba ki la don kumba 197 tylli ki jingjia khaïi tuh ïa ki masi ïa kiba la ïoh jingtip ba ki la jia ha u snem 2022, ha kaba ki la don 31 tylli haduh mynta, la ïathuh ki pulit. U Singla u la ong ba la shim kylliang ïa ki Drone na ki kynhun jong ki tnat ba dei khmih halor ki kam beaiñ hynrei mynta ki la don tang kawei kaba long ha ka dor T. 1.25 lak ïa kaba la ïoh ban siew na ka pisa jong ka Corporate Social Responsibility bad pyndonkam ïa ka man ka sngi.
“Ka jinglah ban pyntreikam na ka por sha ka por kan sa ïarap ha ka ban pynsangeh ïa ki kam beaiñ ha ka thaiñ, bad ki la don ki jingpyntreikam ba la pynlong ha ki 40 tylli ki shnong ha kine ki khyndiat sngi ba la leit,” u la ong.
