Kolkata, ïaïong:
Ka Calcutta High Court ha ka lah sngi U Blei ka la ong ba ka kaiphot ba la phah da ki pulit ka jylla ka la batai ba ki jingïakynad ba la jia ha Ram Navami ki dei kiba la mut lypa, wat lada ka seng TMC bad BJP ki la ïai bteng ban ïakdew kti markylliang ha kaba ïadei bad ka jingjia. Ka ïingbishar ka la bishar bniah halor ka jingmudui ba la phah da u nongïalam jong ka liang pyrshah ha State Assembly bad u nongïalam jong ka seng Bharatiya Janata Party (BJP) u Suvendu Adhikari ha kaba u la phah ban tohkit ha ka kynhun National Investigation Agency (NIA) ha kaba ïadei bad ka jingïakynad kaba la jia ha West Bengal.
“U Police Commissioner jong ka Howrah u la ai da ka kaiphot kaba 54 sla, kynthup kiwei pat ki jingthoh. Ki kaiphod ba la ïoh na ka jingtohkit kaba hashwa ki la paw ba ka la don ka jingmut lypa ha kaba ïadei bad ka jingwanrah ïa ka jingïakynad. Ki la don ki jingkynnoh ba ki la don ki jingkawang maw na tnum ïing. Ha kaba ki la paw shai ba kim shym la long tang hapoh ki 10 haduh 15 minit,” la ong ka kynhun nongbishar jong u Chief Justice ba shipor u TS Sivagnanam bad u Justice Hiranmay Bhattacharyya.
Ka kynhun nongbishar ka la buh ïa ka hukum jong ka. “Ka kaiphod ka la ïathuh shuh shuh da kaba ong ba ka jingïakynad ka la jia hapdeng ki ar kynhun. Lah ban don sa kawei pat ka kynhun kaba kwah ban shim kabu kum ha kane ka por ba jia kine ki jingjia. Lada jia ba kata ka kynhun ka don bynta, ka la donkam na ka bynta ban phah tohkit ha ki kynhun tohkit jong ka sorkar kmie. Kane ka long kaba shem jingeh na ka bynta ki pulit ka jylla ba kin lap. Lah ban don mano re mano ki ban thang bad pynpluh, ha kaba nangne ka jingïakynad ka la nang pur. Khlem da phah tohkit ha ki kynhun tohkit jong ka sorkar kmie yn ym lah ban lap ïa ki jingshisha ban don kiba nabar ki ban wanrah ïa ka jingïakynad,” la ong ka kynhun nongbishar.
Ka jingïakynad ka la jia ha ki lai tylli ki distrik jong ka West Bengal kiba kynthup ha Howrah; Hooghly; bad Uttar Dinajpur, ha ka por ba la don ka jingrakhe ïa ka jinglehniam Ram Navami. Hadien ba la mih ka jingïakynad, ka Calcutta High Court ka la hukum ïa ka jylla ba ka la dei ban pyntreikam ïa ki shipai ïada ha ka por ba don ka jinglehniam Hanuman Jayanti. Ki jingpyrkhing hapoh kiba bun ki kyndon ki dang treikam ha ki katto katne tylli ki jaka. Ïa ka jingtreikam jong ka Internet kaba la phah pynsangeh shipor mynta la pyntreikam biang.
