Jaipur, ïaïong:
Ka seng Congress ka la maham jur ïa u nongïalam jong ka seng ha Rajasthan u Sachin Pilot halor ka jingshah thngan kaba la long hynnin ka sngi bad ong ba kane ka jingleh jong u ka long kaba pyrshah ïa ki rukom pyntreikam jong ka seng.
U Pilot u la dawa ba ka sorkar jong u Ashok Gehlot ka la dei ban leh ei ei pyrshah halor ka jingpynshisha ba ka la don ka kam bamsap jong ka sorkar kaba hashwa kata jong ka seng Bharatiya Janata Party (BJP) ba la ïalam da ka Vasundhara Raje.
Ka sorkar jong u Gehlot ka la kyntait halor ka jingpynshisha jong u Pilot ba kam shym la don kano kano ka jingpyntreikam.
“Ka jingshah thngan jong u Sachin Pilot ka la long pyrshah ïa ki jingsngew bad ki rukom pyntreikam jong ka seng. Lada u don kino kino ki mat ba ïadei bad ka sorkar jong u, la lah ban ïakren hapoh ka kynhun jong ka seng ha ka jaka ba un mih hakhmat ki paidbah ne ha ki lad pathai khubor,” la ong u nongkhmih bad nongpynïaid jong ka seng Congress ha Rajasthan u Sukhjinder Singh Randhawa ha ka jingthoh kaba u la phah ha ka lah sngi U Blei.
Kane ka la paw biang ba ka la long ka jingpynibor hapdeng u Pilot, ïa uba la khmih lynti ba un sa ïakhun ïa ka shuki Myntri Rangbah la kham slem bad u Gehlot, uba long mynta u Myntri Rangbah.
U Pilot u la ong ba ka long kaba donkam ban pyntikna sha ki briew ba ka sorkar Congress ka la leh mynleh ha ki jingkren bad ki jingkular jong ka ba ka la khlei hashwa ban don ka ilekshon Assembly jong u snem 2018.
U la ong ba ka sorkar jong u kam shym la lah ban leh ei ei ha kaba ïadei bad ka jingïakhun pyrshah ïa ki runar, halor ka jingtih beaiñ ïa ki marpoh khyndew, ka jingklun jaka bad halor ki jingpynshisha kiba long pyrshah ïa u Lalit Modi.
U Pilot u la pyni ruh ïa ki Video barim jong u Gehlot uba la kynnoh ba ka Raje ka la don bynta ha ka kam bamsap bad ong ba u la leh ïa kaba bakla ba balei um shym la leh eiei ne ban phah pynlong ïa ka jingtohkit kiba bniah ha kaba ïadei bad kine ki jingjia.
U la ong ba ka sorkar Congress ka la don ki sakhi ba biang kiba long pyrshah ïa ka sorkar ba hashwa jong ka seng BJP hynrei kam shym la leh ei ei.
“Ngim lah ban ïakhun ïa ka ilekshon lada ïa kine ki jingkular ym shym la lah ban pynurlong. Ngi la don ïa ki sakhi ba biang. Ngi la dei ban pyntreikam. Ngin sa hap ban ïakhun ïa ka ilekshon. Shen kan sa don ka jingpyntreikam ïa ka Model Code of Conduct. Ngi la hap ai jubab sha ki paidbah,” la ong u Pilot.
