Chandigarh, ïaïong:
Kumba la ïathuh ka tyllong khubor, la ong ba ki la don kumba saw ngut ki shipai kiba la ïap ha ka jingjia jong ka jingïasiat kaba la mih hapoh ka jaka treikam jong ki shipai ka Bathinda kaba don ha Punjab hynnin ka step.
Kane ka thaiñ ka la shah ker kut ha ka kynhun jong ki shipai bad ka la don ka kynhun shipai kaba la pynlong ïa ka jingleit khynra, la ïathuh u South Western Command jong ki shipai ka tnat Army ha ka jingthoh kaba u la phah.
“Ka jingjia ïasiat ka la jia ha ka por ba dang step bha hynnin ka sngi, ha ka por 4:35 hapoh Bathinda Military Station. Ka kynhun Station Quick Reaction Teams ka la pynkhlaiñ ïa ka jingpyntreikam. Ïa kane ka thaiñ la kerkut bad la khang ha ka ban rung ban mih. Ka jingleit thwet bad khynra ka dang ïai bteng haduh ba la thoh ïa ka khubor. Kumba la ïathuh ka tyllong khubor la ong ba ki la don kumba saw ngut kiba la ïap ha ka jingjia,” la ong ka jingthoh ba la phah na ka tnat shipai Army.
Ki shipai ki la ïathuh ba ka suloi Insas bad kumba 28 song ki kuli ïasiat ki la jah ha kine ki ar sngi ba la leit shwa ban jia ka jingjia.
Ka tyllong khubor ka la ïathuh ba ka jingsiat ka la jia ha ka por ba ki shipai kim shym poi pyrkhat.
U Senior Superintendent Of Police jong ka Bathinda u GS Khurana ha ka jingïakren bad ki nongthoh khubor u la ong ba ka kynhun pulit ka la ap shabar jong ka jaka treikam jong ki shipai bad ki shipai ka tnat Army kim pat rung shapoh phyllaw jong ka jaka treikam.
U Additional Director General of Police, jong ka Punjab u SPS Parmar ha ka jingïakren bad ki nongthoh khubor u la ong ba kane ka jingthombor kam dei kaba la leh da ki lehnoh.
U la ong ba kane ka kam thombor kam dei kaba wan na bar hynrei ka dei kaba la mih napoh ka kynhun hi.
