Bhubaneswar, ïaïong:
Naba ka jingshit jong ka sngi ka la kiew sha ka 40-Degree Celsius ha ki khyndai tylli ki jaka kiba don ha kylleng ka Odisha ha ka sngi Ba-ar, u Myntri Rangbah jong ka jylla u Naveen Patnaik u la hukum ba la dei ban khang noh ïa baroh ki skul haduh ka klas 10 ha ryngkat ki Anganwadis kaba la long naduh hynnin ka sngi haduh ka 16 tarik Ïaïong.
Ha kine ki khyndiat sngi ba la leit, ka jingshit jong ka sngi ka la nang kiew ha ka jylla ha kaba ka tnat kaba dei khmih halor ka jinglong jingman jong ka suiñbneng ka la pynmih ïa ki jingmaham ha kaba ïadei bad ka jingkiew jong ka jingshit ha kylleng ki jaka jong ka Odisha.
Ha kaba ïadei bad ka jingai hukum, ki Anganwadis bad ki skul haduh ka klas 10, jong baroh ar kata jong ka sorkar bad jong ki riewshimet, kin sa hap ban khang haduh ka 16 tarik, la hukum u Myntri Rangbah.
Haba u la wan phai na Japan ha ka janmiet jong ka sngi Ba-ar, u Patnaik khlem da pynslem u la pynlong ïa ka jingïalang bad ki heh sorkar ha kaba ïadei bad ka jinglong jingman halor ka jingkiew jong ka jingshit bad kumjuh ban ïaleh ban tehlakam halor ka jingdon jong ka khlam Covid ha ka jylla.
U Patnaik u la hukum ïa ki heh sorkar, khamtam ki Panchayat Raj, ka tnat Housing & Urban Development bad ka Energy Departments, ba ki dei ban ïai pynkhreh ha kaba ïadei bad ki jingdonkam halor kine ki jing-long jingman.
U Myntri Rangbah u la bthah ïa ki heh ba dei khmih ba ki la dei ban pyntikna ha ka ban pynïaid beit ha ka jingpynpoi um bam umdih, ha baroh ar kata ha ka thaiñ sor bad nongkyndong.
U la hukum ruh ïa ka Energy Department ba ka la dei ban pyntikna ha ka ban phah bording khnang ban lah ban pynurlong ïa ka jingdawa ha kum kane ka por ba kiew bha ka jingshit.
U Patnaik u la ai jingmut ruh ïa ki heh ba dei khmih ba ki la dei ban ïakynduh ïa ki heh jong ki kynhun ba bun jong ka tnat bad ban pynkhreh hashwa ïa ki jingdonkam.
